Arsenal chuan an interim-manager Freddie Ljunberg-a hnuaiah an game hmasa ber khelin kaithar Norwich City chu Carrow Road-ah an tlawha, 2-2 in team hnihte hi an inhnehtawk.

Mikhual lam Norwich hian he inkhelah hian vawi hnih hma an hruaia, mahse Arsenal hian an captain Pierre-Emerick-a goal hnih hmangin an sut ve ve.

Arsenal hian a zawna game sarih chhung hnehna an chan theih loh hnuah manager Unai Emery chu kar liamta khan banin an assistant manager Ljunberg hi manager atan an ruat lailawka, Gunners hi chak zo leh lehin a zawnin competition hrang hrangah game 8 chhung hnehna an chang tawh lo.

Ljunberg chuan inkhel chungchang sawiin, “Inkhel bul kan tan tha viaua, kha kha ka football khelh duh dan pawh a ni a, inkhel kan thunun tha em em a, kha kha goal khung kan mamawh lai tak a ni bawk. Goal kan khung lawk thei lova, min thiat awlsam thin hle a, chuvanga goal hnih chhuah pawh kan ni.

“Lawm a harsaa mahse player-te rilru put hmang kha a dika, khual mualah vawi hnih si phur mahse an sut leh ve ve a, chu chuan duhna tak tak an nei tih a ti langa, tih tur erawh kan la ngah hle.

“He club hi che tha turin ka duha , a awmzia berah chuan hnehna chan chiah hi a pawimawh tihna a ni a, chu bak chu ka rilruah eng mah dang a awm lo. Norwich lakah pawh khan hnehna chan ka duh em em a, kan chak zo lova pawi pawh ti viau mah ila thil tha tam tak ka hmu tel bawk a ni,” a ti.