03 Sep 2020 03:22

inkhel

Thunder hnehtu Rockets in Lakers an hmachhawn dawn

James Harden zarah Houston Rockets chuan Oklahoma City Thunder chu NBA playoff an khelh mekah an hneh.

Hun tawp dawn, second 4.8 chauh a awm tawh tihin Thunder tan Luguentz Dort chuan three-point score a tum a, James Harden chuan ball a lo dang hlauh mai a, hei vang hian hun tawpah 104-102 in an chak theih phah a. Western Conference series an khelhah 4-3 in an chak a, second round an luh theih phah a ni.

Game pawimawh tak maiah hian Houston chu hmahruaitu an ni chho a, a tawp dawn hnaih lamah pawh hma an hruai chiah chiah zel a. Minute 1:25 a la awm tihin PJ Tucker chuan point a score a, Rockets chuan 103-102 in hma an hruai a. A hnuah Robert Covington chuan free throw atangin a thun ve leh a, 104-102 a ni leh a, hetih lai hian second 1.4 a la awm a ni.

Hun a tawp zui a, khawi lam mah hian point an score belh thei ta lo a, Luguentz Dort khan three-point kha thun ta se, second 4.8 chauh a awm tawh bawk avangin Thunder chu 105-104 in an chak thei chiah dawn a. James Harden chuan ball a lo dang thei hlauh a, Rockets an chak theih phah ta a ni.

He inkhelah hian Robert Covington leh Eric Gordon te chuan Houston Rockets tan point 21 ve ve an thun a, Covington hian rebound 10 a la a, Russell Westbrook pawhin a team hlui Thunder lakah point 20 chu a thun bawk a ni.

Kum 21-a upa Canadian player Luguentz Dort chuan a vanglaia point a score hnem ber tum a tawng a, Thunder tan point 30 a score thei a. Chris Paul chuan point 19 a thun bakah assist 12 neiin, Oklahoma City tan hian rebound 11 a la bawk a ni.

Western Conference second round-ah hian Houston Rockets chuan LeBron James telna Los Angeles Lakers an hmachhawn dawn a ni.