Goal-line technology chungchang a sawinaah Erling Haaland chuan throw-in dan a hriat loh thu a sawi chhuak.
Throw-in hi chu Mizotawng chuan theh a ni mai a, professional footballer tan chuan a rules hriat loh chu a mak kan ti hle ang.
Premier League leh Europe league lian dangah theh sual hi an awm mang lo a, mahse hmuh tur hi a awm leh zauh thin.
Goal chhunga ball a luh leh luh loh enna goal-line technology chu Premier League-ah pawh hman a ni mawlh mawlh tawh a, mahse a out leh out loh chungchang enna erawh a la awm lo thung.
Nikum November thlaa Arsenal leh Newcastle United an inhmachhawn tum pawh khan, sawisel hlawh tak goal a luh phah a nih kha.
Manchester City official podcast-ah Erling Haaland chuan, "Goal line technology ang hi mual kil sir tinah hian hman vek nise kei chuan ka duh, ball a out chuan awlsam takin a out tih kan hre nghal vek thei dawn a.
"Hetih lai hian throw-in chungchang erawh ka ngaihven lem lo kei chuan, khawi lamah pawh theh se, a inang vekah ka ngai, kut pahnihin ball an theh a ni mai a.
"Throw-in rules chungchang pawh ka hre lem lo, kei hian ball theh dawn ta ilang chuan, kan tihsual ngei ka ring bawk. A hniam zawng emaw a sang zawng emaw, khawi zawng pawhin theh se, inang vekah kei chuan ka ngai," tiin a sawi.
Haaland hi a ram Norway tan a fehchhuak ve mek a, Norway hi Euro 2024-ah an qualify ve lo. Zirtawpni khan Czech Republic nen an inhmachhawn a, minute 75 khel vein, 2-1 in Norway an chak lo.
Thawhlehni hian Norway chuan Slovakia an hmachhawn dawn, Oslo-a an inkhelh zawh veleh Haaland hian Etihad Stadium a pan leh nghal vang vang ang a, Pathianni zanah Arsenal an hmachhawn dawn a ni.
Man City hi Premier League table-ah 3-na an ni a, hmahruaitu Arsenal nen an inkar chu point 1 chiah a ni, hei vang hian Pathianni zan match hi fixture pawimawh tak a ni dawn.
Sawmna : Website advertisement hi min click sak ve thin turin kan sawm a che u.
Haaland hian tun season competition hrang hrangah Man City tan goal 29 a khung tawh a, Premier League-ah game 23 atangin goal 18 a khung tawh bawk.