Stephen Curry chu Nilainia an inkhelhnaa a inhliam avangin a lo berah thla thum vel chu a inkhel thei dawn lo.

Golden State Warriors star Stephen Curry chu Nilainia Phoenix nen an inkhelh tumin a chesual a, a kut veilam chu a tina a. A kut ruh chu a tihkhawloh avangin Los Angeles khawpuia Cedars-Sinai Kerlan-Jobe Institute ah an zai a, hlawhtling taka zai a nih tho rualin, a lo berah thla tum vel chu a inkhel thei dawn lo a ni.

Warriors chuan thu chhuah an siam a, “Stephen Curry chu hlawhtling taka zai a ni a, a kut na nghah dam chhung hi chiang taka sawi theih a ni lo a, a lo berah thla thum chu a chawlh a ngai dawn a. Thla thum hnuah a dinhmun kan la puangzar leh zel ang,” an ti.

Phoenix Suns center Aron Baynes chuan Nilainia Golden State Warriors nen an inkhelh hian Stephen Curry hi a titlu a, heta a tluk pah hian a kut veilam chu a bawh pah a, a ruh chu a khawlo zui ta a. Curry hi a chhuak zui nghal a, an inkhelah hian Warriors chuan Suns chu 121-110 in an hneh lo bawk a ni.

Vawi ruk ngawt All-Star ah pawh tel tawh, vawi hnih chu NBA MVP pawh lo ni tawh Stephen Curry hi kum thar February hma chuan a inkhel thei tawh dawn rih lo tihna a ni a. Tun season chhunga la che fuh lo tak Warriors tan chuan a pawi lehzual dawn hle a ni.

Golden State hi an che fuh lo tluang hle a, Kevin Durant chu a chhuak a, hun rei tak chhung Klay Thompson chu an chhawr theih dawn loh hnuah Stephen Curry a inhliam ve leh zel a. Klay Thompson hi a khup na vangin tun season chhung chuan chhawr theih a nih a rinawm lo hle.

2015 leh 2019 inkara vawi nga ngawt a zawna NBA finals lut thei Warriors hian chak hmel an la hmu thei meuh rih lo a. Phoenix Suns an hneh loh hma pawh hian Oklahoma City Thunder leh Los Angeles Clippers pawh an lo hneh lo tawh bawk a ni.