McLaren chuan nikum september thla atanga chief executive hnathawk tan German pa Jost Capito nen an in then thu an puang.

Kum 58-a upa Capito hi McLaren chairman Ron Dennis chuan a lalut a, September atangin a hna a thawk tan chauh a ni. Capito-a'n McLaren a zawm hnu reiloteah amah laluttu Ron Dennis-a'n McLaren a chhuahsan leh tak si avangin Capito hian tun dinhmun hi a thleng niin a lang.

November thla khan Ron Dennis hian McLaren chhuahsan in American mi Zak Brown chuan a thlak a, Zak Brown hian executive director hna a chelh zui a ni.

Jost Capito hian McLaren a zawm hma hian VW Motorsport-ah kum li chhung hlawhtling takin a lo thawk tawh a, Volkswagen Motorsport hi kum li chhungin vawi thum zet World Championship-ah a chak pui thei a ni.

McLaren hian beiseina sang tak nen Capito hi an lalut a, an beisei ang result a neih pui theihloh vang ni berin a lang. McLaren thupuangtuin a sawi danin, "Jost hian Volkswagen Motorsport chu hlawhtlinna ropui tak a lo chanpui tawh a, chumi a hlawhtlinna hmuh ve beisei chuan kan lalut a ni.

"McLaren hi a hma a kan awmna thinah khan min hruai let leh theih kan beisei em em a, amah pawhin World Championships-a McLaren chu chak pui ngei a tum bawk. MaLaren car-te pawh Formula One-ah a tha ber nihtir leh a tum thu min hrilh bawk a ni.

"Amaherawh chu Jost-a hnathawh dan enin Company lung a awi zanlo a, tuna a thil tihdan leh nakin zela hmalak a tum dan kan enin hian McLaren thuneitute lung a dumlo a ni.

"A pawi kanti tak zet a, Jost hian McLaren Racing chu chhuahsan dawn ta a ni. A hun hman leh zelna turah duhsakna kan hlan a, hlawhtlina duhawm tak tak a chan zel kan beisei pui bawk, "a ti.