​Thla khat hnuah a vawikhat nan Premier League-ah United an chak

09th December 2018, 04:12AM

Old Trafford-ah Manchester United chuan Premier League kaithar Fulham an lo mikhuala, United hi chak nuamsa hle in 4- hnehna an changa, Premier League bikah November ni 3 hnuah an vawikhat chak lehna a ni.

United tan hian Ashley Young, Juan Mata, Romelu Lukaku leh Marcus Rashford-te chuan goal khat theuh an khunga, Fulham tan Aboubakar Kamara chuan penalty spot atangin a khung ve bawk. 68mins-ah Fulham player Andre-Frank Zambo Anguissa chu yellow card vawihnih a hmuh avangin hnawhchhuah a ni bawk.

United hian khelh 16-ah point 26 hlawhchhuak tawhin paruknaah an awm mek a, Fulham erawh table mawngphahah awm chhunzawm zelin khelh 16-ah point kua chiah an la hlawhchhuak.

Manchester United 4-1 Fulham

(Young 13’, Mata 28’, Lukaku 42’, Rashford 82’) (Kamara 67’ pen)

PLAYER RATINGS

Manchester United - De Gea 5, Dalot 8, Jones 7, Smalling 6, Young 7, Matic 6, Herrera 6, Rashford 9, Mata 7, Lingard 6, Lukaku 7. Subs - Rojo 6, Fred 5, McTominay 5.

Fulham - Rico 6, Odoi 6, Ream 5, Mawson 5, Bryan 5, Seri 5, Anguissa 5, Schurrle 6, Cairney 4, Sessegnon 6, Mitrovic 5. Subs - Vietto 5, Kamara 6, Cisse 5.

Match Report

Inkhel tan atangin Jose Mourinho-a naute an khel tha a, inkhel pawh an thunun. Goal thun nan hun an mamawh tam lova, minute sawm chuang hret khelh a nih captain Young chuan United goal hmasa ber a khung. Mual veilam atangin Young hian ball a laluta, Fulham defender pakhat bumin, far post top corner-ah mawi em em in a pet goal. Darkar chanve khelh a nih hma hretin United chuan goal khung belhin, Mata chuan Red Devils goal hnihna a khung. Lukaku chuan mual veilamah ball khalhin, Rashford a pe a, Rashford hian ball hi box chhungah khalh lutin Mata a pe a, Mata hian lei hrulah petin, goal-ah a lut. Half time hma lawkin United-in goal an khung leha, Jesse Lingard chuan box chhunga inpawt Mata chu tha takin through ball a pe a, Mata hian goal hmazawn lamah pe phei ve leh nghalin, Lukaku chuan hnai tak atangin a lo pet goala, first half hi 3-0 in a tawp.

Second half tan a ni a, minute hnih vel awrh a liamin Rashford chuan mual veilam atangin ball a khalh luta, box pawn atangin goal-ah a pet a, Fulham keeper Rico a ti buai a, Rico hian lo save per in, Lukaku chuan lo pet ve leh mahse goal-ah a chan tir thei lo. Darkar khat khelh a nih hma hretin Fulham-in chance an nei ve a, United box chhungah in pass kualin, Dalot chuan ball pet chhuah a tuma, pet fuh chiah lovin Schurrle tan rem takin ball a rawn kal a, ani hian chhuih luh tum mahse goal a pet khum. Schurrle a chance nei hnu chiah hian United-in chance tha tak an hlah a, box chhung dinglamah Mata chuan ball khalhin, Herrera a pe a, Herrera hian goal-ah pet mahse a pe zawn lo hle, pet zawn hret se chu a goal ngei a rinawm. Darkar khat khelh a nih chianin mual veilamah Schurrle leh Vietto-te chuan ball an inpe kuala, Schurrle hian goal veilam sir atangin goal-ah a pet a, mahse a pet zawn lo. United lamin chance nei zui ve leh nghalin, Lukaku chuan ball a khalha, mual dinglama awm Dalot pe thla in, Dalot hian lei hrulah tha em emin cross lut mahse goal hmaa awm Lingard chuan ball a lo khawih thei lo.

66mins-ah Herrera chu box chhungah Kamara lakah foul-in Fulham-in penalty an hlawhchhuaka, penalty spot atang hian penalty hlawhchhuaktu Kamara hian Fulham tan a khung. Herrera-a’n Kamara a tih tluk dan hi replay-a a lan dan chuan Herrera hian ball a khawih hmasa ngei a, mahse referee chuan penalty pekna tlakah a ngai thung. Hemi hnu lawk hian Fulham player Anguissa chu hnawhchhuah a ni a, Rashford ball chhuhsak a tum chu referee-in yellow card pek lehna tlakah ngaiin Anguissa hi yellow card vawihnihna hmuh niin, hnawhchhuak a ni ta a ni. Anguissa hian Rashford hi a khawih fuh lova, ball chauh khawih mahse referee erawhin card phawrhna turah a ngai thung. Replay-a chiang zawka en chuan referee hian a zawnin a tisual pawh a tih theih awm e.

78mins-ah Dalot chu mual dinglamah ball pek niin, Fulham box chhungah kum 19 ful back hian khalh lutin, tha takin a cross a, mahse United hmatawng ten goal-ah an lo chantir thei lo. Hemi hnu deuh hian Rashford chuan chance tha tak a nei a, tha taka Fulham defender-te bumin goal-ah a peta, mahse Rico chuan a lo save. 81mins-ah mual veilam atangin Rashford chun Lukaku ball a pe a, Lukaku hian box chhungah khalh lutin goal-ah a peta, mahse Rico bawk chuan a lo save. 82mins-ah United-in an goal lina an khunga, goal khungtu hi Rashford niin , mual veilam atanga ball a lakluh chu box veilam pawn chiah atangin mawi takin a chhuih luta, tun season-a a goal thumna a khung. Goal luh belh tawh lovin inkhel chu 4-1 a tihtawp a ni.

Copyright © inkhel.com 2024. All rights reserved.