Manchester United defender Lisandro Martinez chu a inhliam avangin a chawl rei dawn a, United chuan an defender hi a lo berah chawlhkar 8 tal a chawlh a ngai dawn tih an puang.

Sunday liamta khan United hian Premier League inkhelah West Ham chu si thum faiin an hneh a, he inkhelah hian Martinez hi inhliamin, an inkhelh zawhah United manager Erik ten Hag chuan Argentine defender hi a inhliam nat thu a sawi.

Kum 26 mi hian a khup dinglama ligament a tih chhiat avangin thla hnih tal a chawlh a ngai dawn a, a hma berah April thla laihawl velah bak a inkhel thei tawh dawn rih lo a ni.

Martinez hi Vladimir Coufal nena ball an inchuhnaah a inti na a, khelh chhunzawm tum zet mah se 71mins-a lak chhuah niin, season tawp lamah bak a khel kan hmu tawh dawn lo.

Tun season-ah Martinez hi hliamin a tlakbuak nasa hle a, thla thum dawn a inhliam hnuah thla hmasa ni 14 khan a inkhel leh chauh a, a lo kir hnuah United hian game 4 khel tawhin, vawi 3 an chak a, draw vawi 1 an nei bawk.

United manager Ten Hag chuan centre-back ah duhthlan tur a la nei nual a, Raphael Varane, Harry Maguire, Jonny Evans leh Victor Lindelof te an inkhel thei vek a ni.