Tottenham left-back Danny Rose chuan a contract neih lai a hman zawh hunah North London club Tottenham chu a chhuahsan tur thu a sawi a, nakkum January thlaa transfer window inhawn hunah chhuah a tum lo tih a sawi bawk.

English fullback Rose hian Tottenham-ah thla 18 daih contract a la nei a, Tottenham chairman Daniel Levy chuan contract thar zawrh an tum tawh loh thu hrilh mahse Rose hian pawi a ti lo.

Kumin nipui chhung khan Tottenham chuan Rose hi chhuah tir dan an ngaihtuah niin chanchinbu mite chuan an ziak nasa hle a, Rose pawh hian chhuah a duh niin chanchinbu mite chuan tarlang bawk mahse Rose chuan a contract zawh hmaa chhuah a tum loh thu a sawi.

Chhuak tur angin thawm nei na viau mahse Rose hi North London-ah a awm chhunzawma, tun season-ah Tottenham player pawimawh niin vawi 11 a inlan tawh.

Rose chuan, “Club hotute lam thil tum chu a hriat viauin ka hria a, thla 18 daih contract ka la neih thu ka sawi tawh a, ka contract a zawh hma chu khawiah mah chhuah ka tum lo. Daniel Levy khan nipui lai khan contract thar min ziahpui an tum tawh loh thu min hrilha, pawi ka ti lova, an thutlukna ka zah sak bawk.

“Thla 18 hnua ka contract zawh hunah Tottenham hi ka chhuahsan anga, ka chungchang thu ah hian thu belhchian dawl lo tak tak ziah buai a ngai lova, January-a ka chhuak tur anga sawi chiam pawh a ngai lo, eng mah a thleng dawn lo tih tunah hian chiang takin ka sawi tlang nghal e. Nipui lai pawh khan media-te thil tum kha ka hre veka, mahse eng mah lo mai a ni. tu mahin min dawr lo,” a ti.