World No. 1 lo ni tawh thin, Serena Williams chu nau a neih avanga thla 14 zet a inkhelh tawh loh hnuah rawn kir lehin, Indian Wells first round-ah a chak nghal.

Kum 36 mi, American star hian Kazakhstan mi Zarina Diyas a hmachhawn a, he inkhelah hian Serena hi 7-5 6-3 in a chak a, second round a lut nghal a. Raipuar chunga 2017 Australian Open champion a nih hnua singles match a khelh leh hmasak ber a ni.

Vawi 23 zet Grand Slam champion lo ni tawh hian, “Tlem chuan ka khawr deuh a, mahse a pawi phah lem lo a. Chawlh rei tawh nen thil awlsam tak chu a ni hauh lo na a nawm chu a nuam viau si,” a ti.

An inkhelh dawna court a rawn luh dawnin mipuite chuan Serena Williams hi ding chungin an lo lawm a. A pasal Alexis Ohanian pawh mipui zingah a thu a, a nupui inkhel hi a tawiawm bawk a. Second round-ah Serena hian 29th seed Dutch player Kiki Bertens a hmachhawn leh ang.

September 1, 2017 khan Williams hian fanu Alexis Olympia a nei a. A nau nei hi a tal buai angreng hle a, a chuapah thi te a tling a, a pawi thui teuh hle nghe nghe a. Kumin Australian Open ah pawh inpeih a la intih loh avangin a tel loh phah hial a ni.

Ni 404 chhung zet a inkhelh tawh loh hnua a chak nghal thei chu lawmawm a tih thu sawiin, Serena chuan kum khat leh fa pakhat neih hnua han chak leh nghal chu ropui a tih thu a sawi a. A kawng zawh tan mekah chuan theihtawp chhuah a tum zel thu a sawi bawk.

Stadium Court 1 inkhel entu mi 10,000 vel bawr kal khawm chuan Serena Williams rawn kir leh hmuh chu an chak ber a ni a. Heta entu zingah hian Serena unau Venus Williams pawh a tel a. Anni pahnih hi an chak dun zel a nih chuan third round-ah an intum thei dawn a ni.