03 Jun 2019 05:22

inkhel

Third quarter kha kan chhiatpui: Kawhi Leonard

Kawhi Leonard chuan NBA Finals khelh meka Game 2 an khelh zawh takah khan third quarter-a an chet chhiat an tuar tih a sawi chhuak.

Game 2-ah hian Toronto Raptors chuan a tir atangin hma an hruai chho deuh ngar ngar a, Game 1-ah pawh a chak zawk an lo nih tawh avangin beiseina an nei sang hle a. Amaherawhchu, third quarter an khelh atangin lei rem an rap hleithei ta lo a, a tawpah Golden State Warriors chu an chak a, game khat ve ve an lak phah a ni.

Golden State Warriors leh Toronto Raptors te inkhelah hian half time a nihin Toronto chuan 59-54 in hma an la hruai a. Chawlhlawk hnua an khelh leh chiah hian Warriors chuan 18-0 ngawtin hma an hruai a, a tawpah 109-104 in an chak zui ta a ni.

Leonard chuan point 34 a score a, rebound 14 a la bawk a, heti chung hian Raptors chu playoff-ah a zawnin game ruk chu a chakpui thei ta chuang lo a. Eastern Conference Finals-ah a zawnin Milwaukee Bucks chu vawi li an hneh a, chumi hnuah Finals Game 1-ah Warriors chu an hneh leh a, a zawnin vawi nga chu an chak tawh a, Game 2-ah chak tura ngaih an ni chho ngar ngar a, an chak zo ta lo thung.

“Third quarter kan khel a, a tir minute 5 emaw, minute 4 leh a chanve vel emaw chhung kha chu point kan score miah lo a. Khatianga kan chet fuh theih loh kha lehlam pawlin an rawn hmang tangkai a, kha khan engkim a hril ta a ni ber,” tiin Kawhi Leonard chuan a sawi.

“Kan thun theih loh laiin anni khan an thun chho zel mai a, 18-0 ngawtin an kal tluang chho a, keini kha chu kan chhe ta vek a ni ber a. 18-0 a nih tawh hnu pawha point score theih tlat loh chuan chak loh bak hmabak dang a awm thei tawh lo,” a ti bawk.

A sawi zelnaah, “A tir lamah kha chuan kan khel pangngai hle a, kan che vel pawh a dik a, kan khel rei tial tial a, kan zuai telh telh niin ka hria a. A lehpekah chuan theihtawp tak meuh kan chhuah a tul lehzual dawn a ni,” a ti.

A tawp lamah Toronto chuan beihpui an thlak leh a, 106-104 a nih tawh laiin Andre Iguodala chuan hun tawp dawn tak meuhah three-point a thun leh a, Raptors tan chak ngaihna a awm zui tawh lo.

Team pahnihte chuan game khat ve ve an la tawh a, 1-1 niin, Game 3 chu Oakland, California a Oracle Arena-ah an khel leh ang.