Gareth Bale chu Tottenham Hotspur player ropui tak ni thin mahse a naupan lai atangin Spurs hmelma Arsenal legend Thierry Henry chu a ngaihsan ber thin thu a sawi.

Real Madrid star Gareth Bale chuan North London lamah kum ruk chu hun a hmang hman a, hemi chhung hian Tottenham player pawimawh berte zinga mi ni thei turin hma a sawn chho a. A naupan lai atang tawhin Arsenal striker Thierry Henry chu a ngaisang thei hle niin a sawi a. Kum 29-a upa Bale hian Thierry Henry bakah Ryan Giggs pawh a ngaisang thei hle niin a sawi a ni.

Welsh star Bale hian 2007 khan Southampton chhuahsanin Tottenham Hotspur a zawm a, Spurs tantute player duh ber a ni chho hman tihin Real Madrid chuan a hun laia khawvela footballer man to ber ni turin £86 million zetin an lei a ni.

Bale chuan, “Arsenal inkhel kha ka en nasa thei khawp mai a, a bik takin Thierry Henry inkhel lai kha hmuhnawm ka ti thei em em a, Dennis Bergkamp pawh kha ka duh thei viau bawk a. Anni pahnih kha ka ngaihsan zualte chu an ni a, Tottenham tantute tan chuan a ngaihnawm vak lo maithei,” a ti.

A sawi zelnaah Bale chuan Manchester United midfielder thin Ryan Giggs chu a ngaisang thei viau bawk a, 1999 a FA Cup a Manchester United in Arsenal an hneh tuma an chakna goal a thun dan kha tih ve a tum nasa thei hle niin a sawi.

“Giggs kha ka entawn nasa thei hle bawk a, football ka khelh tan tirh lamah khan ka ngaisang thei em em a. Welsh a ni a, a ke veilam a hmang thiam bawk a, kha vang tak khan ka duh phah lehzual thin a. A inkhel kha ka en nasa a, hmuhnawm ka ti thei hle,” tiin Bale chuan a sawi.

“Naupang dangte ang bawkin footballer lar tak nih ka chak ve thin a, kan inkhelh changin kan player duh deuhte hming kan inphuah thin a, kei kha chuan Giggs ka ni ka ti ve ziah a. Ka awm hmul awm ve vak lo mahse Giggs nih kha ka chuh tlat thin,” a ti bawk.