14 Sep 2020 08:46

bakteaJr.

Mizo tlangval

​Thiem-a’n Zverev lehthalin US Open title a la

US Open 2020 chu a hmawr bawk fel a ni ta a, Men’s Singles final hmuhnawm em emah Dominic Thiem leh Alexander Zverev-te inhmachhawnin, Thiem hian hnehna a changa, a champion.

Austrian player Thiam hian a tirah set hnih a hlohva, mahse a tawp set thum la in 2-6, 4-6, 6-4, 6-3, 7-6 (8-6)-in a chaka, a Grand Slam title hmasa ber a la.

Kum 27 mi Thiem hi a final thlen vawi linaah a champion theia, kum 23 mi German player Zverev chu a naupanna a lang tih theih a ni a, tawnhriat ngah zawh Thiem hian Zverev-a chetsual a hmang tangkai thiam hle.

Thiem chuan a champion hnuah, “Vawiin hian champion pahnih nei thei ila kan ti hle, champion kan phu ve ve ni,” tiin a thianpa Zverev hnenah a sawi.

Kum 2004-a Gaston Gaudio-a’n French Open a lak hnuah, Thiem hi Grand Slam final-a set hnih hloh hmasa zeta champion zui leh thei hmasa ber a ni.

US Open bikah, Thiem hmaa final-a set hnih hloh hmasa zeta champion thei hnuhnung ber hi Pancho Gonzales a ni a, ani hian Thiem hma hian kum 1949 daih tawh khan set hnih hloh hmasa zetin a rawn champion.

Kumin US Open-ah hian champion tura rinkai pahnih Rafael Nadal leh Roger Federer te chu COVID-19 buai avangin an inlan lova, champion tura rinkai ber pakhat Novak Djokovic inlan mahse, ani hi fourth round-ah a line judge a vuak per avanga default a ni a, a khel chhunzawm thei ta lo bawk a ni.