Liverpool midfielder Thiago Alcantara chu a inhliam hnuah rawn kir leh chauh mah se a inhliam leh nghal a, Thiago hi Liverpool tan a inlan tawh lo maithei.

Sunday liamta-a Arsenal in 3-1 a Liverpool an hneh tum khan kum 32 mi hian thla sawm hnua a game hmasa ber khelin, 85mins-ah a lut a, hetah hian inhliam leh nghalin, eng anga rei nge a chawlh dawn tih a la hriat loh.

Thiago hi nikum April thla a Liverpool leh West Ham an inhmachhawn tumin a inhliam a, thla 10 vel zet a chawl a, tunah muscle injury a neih leh avangin tun season-ah a inkhel thei tawh lo maithei a ni.

Spanish midfielder hian tun season daih bak Anfield-ah contract a nei tawh lova, hliamin a tlakbuak nasa bawk nen Liverpool hian contract thar an zawrh a rinawm tawh lova, season a ral hma-a a dam hman lo a nih chuan Liverpool tan a inlan leh hman tawh dawn lo.

Kum 2020 September thla khan Liverpool hian Bayern Munich atangin Thiago hi an lei a, Thiago hi hetih hunlai hian khawvela midfielder tha ber zinga mi ni mah se Bayern-a kum khat daih bak contract a neih tawh loh avangin Liverpool hian a manah pound maktaduai 20 bak an seng lo.

Liverpool hian beiseina sang tak nen an lalut a, mahse Anfield-a a input luh hnuah hliamin a tlakbuak nasat avangin Thiago hi a inkhel mumal lo hle a, tun season tawpah free agent ni tura ngaih a ni.