Kum 33 mi Thiago Alcantara chu Liverpool-in an chhuah zalen hnuah football a chawlhsan chhunzawm ta.

Season 4 liamta chhung khan Liverpool-ah Thiago hian hun a hmang a, June ni 30 khan a contract a tawp ta a, Saudi Pro League lam pawhin ngaihven viau mah se, football chawlh a thlang ta zawk a ni.

Brazil international Mazinho fapa leh Rafinha unaupa Thiago Alcantara hian Barcelona-ah a football career a tan a, Bayern Munich-ah kum 7 hun hmangin, Spain tan game 46 a khel hman bawk.

He Central midfielder hian La Masia a chhuahsan hnuin Barcelona tan game 101 a khel a, 2010-11 leh 2012-13 season-a La Liga title an lak tum leh, 2011-a UCL no mawi an chawi tum khan tha a thawh hlawk hle.

Kum 2013 nipui lai khan Barcelona chhuahsanin Bayern Munich a zawm a, German club tan season 7 a awm chhungin league title a chawi ziah a, 2019-20 UCL no mawi an chawi pawh khan player pawimawh tak a ni.

Liverpool a pan hnuin inhliam avangin a inkhel thei lo hnem hle. Premier League-ah pawh game 51 chiah a start a ni. Club leh ram tan game 534 a khel a, goal 50 khungin trophy 27 lai a chawi a ni.