26 Feb 2019 06:34

inkhel

Theihtawp chhuah lo tur chu chhuak mai rawh se: LeBron James

LeBron James chuan Los Angeles Lakers player te hnenah playoff khelh tuma theihtawp chhuah an inhuam lo a nih chuan hmun dang pan turin a hrilh.

Los Angeles Lakers leh Memphis Grizzlies te inkhelah LeBron James chuan point 24 a score bakah rebound 12 lain assit 11 a nei bawk a, NBA player awm tawh zingah point leh assist nei tam 10 zinga lang dun thei awm chhun a ni a. Heti chung hian Lakers chuan Grizzlies chu 110-105 in an hneh ta lo a ni.

James hian Lakers chu playoff khelhpui theih a duh thu sawiin, tan pawh a la chho viau a. Mahse, tun hnaiah a zawnin vawi hnih chu an tlawm ta a, hei vang hian inkhelh zawhah pawh James chu a thin a rim hle a, Houston Rockets an lehthal tuma an hmingthatna zawng zawng chu a bo leh vek tawh a ni ber.

Lakers chu Western Conference-ah 11-na an ni mek a, playoff khel thei turin an dinhmun chu a duhawm tawh lo viau bawk a. Tun season chhungin Lakers chu an che fuh thei lo hle a, player inhliam an neih chhoh ve fo bawk avangin an buai belh hle a. Hetiang boruak teh nuaih karah hian LeBron James chuan player te zinga tih tak taka khelh tum lo an awm chuan an team chhuahsan mai tura a duh thu a sawi chhuak a ni.

LeBron James chuan, “Kan dinhmun a tha tawh lo hle a, theihtawp kan chhuah tak meuh meuh a ngai lehzual a. Playoff khelh theih ngei hi duhthusam a ni a, chutiang ti thei tura tan lak pawh tum lo an la awm cheu a nih chuan a tha lo khawp ang,” a ti.

“Tun angah pawh inkhelh lai aia thil dang an la vei lian zawk a nih chuan inkhel ve tlak pawh an ni tawh lo tihna a ni ang a. Chutiang an awm a nih chuan rawn pen chhuak se, theihtawp chhuah ka thei dawn lo ti se, hmun dang pan daih se a tha ber ang,” a ti bawk.

A sawi zelnaah, “Helai hmunah hian an tih tur hi tha takin rawn ti mai se, boruak hrang hrangin a tibuai a nih chuan tih vak ngaihna a awm lo. Kan mawhphurhna a sang a, engtik lai pawhin theihtawp kan chhuah zel tur a ni a, chutianga tih theih zel chu kan duhthusam pawh a ni tur a ni. Eng emaw tak sual chhuah hi kan tum tlat tur a ni,” a ti.

Tun tumah James hian playoff a khel pha lo a nih chuan 2004-05 season hnua playoff a khelh theih loh hmasak ber a ni ang.