Wrestling ngainatute leh ngaina vak lo pawhin an hmelhriat hlawm em em The Undertaker chuan Goldberg chu Super ShowDown neih hunah chawlhtir a tum thu a sawi.

Monday Night Raw-ah Deadman chuan Goldberg chu a cho a, tun kar Zirtawpnia Jeddah, Saudi Arabia-a WWE Super ShowDown neih hunah ring chhunga inhmachhawn theih ngei a duh thu sawiin, Goldberg tan hun tawp a siamsak dawn niin a sawi a ni.

WrestleMania 35 hnuah The Undertaker hi TV lamah a inlan zui ta lo a, tun tum hi a inlan leh hmasak ber a ni a. Kumin May thlaah khan The Undertaker leh Goldberg te inbei tur hi an puang a, a hmain anni hi vawi khat chu an lo intawng tawh a, Royal Rumble 2017 ah Undertaker chuan Goldberg hi a lo chhuahtir tawh a, amah hi Roman Reigns chuan a chhuahtir ve leh a ni.

Tun tum hi ring chhungah mal leh mala an intawn hmasak ber tur a ni ang a, Goldberg tan bik hian WrestleMania 33 ah Brock Lesnar a hneh loh hnua ring chhunga a chet leh hmasak ber a ni ang.

The Undertaker hi chawl tur ang deuhin an sawi hman a, mahse chuti maia duhtawk a tum lo hle a. Kum 25 chhung vel zet WWE khawvela a tal hnuah pawh la tel zui zel a la thlang a. A chanchin thenkhat han bih kual thuak thuak ila.

Hming pariat
WWE superstar te chuan an hming an thlak fo a, The Undertaker pawh hian a hming a thlak kual ve nual tawh a, entertainment wrestling khawvela a awm hnuah hming pariat a nei tawh a ni.

The Undertaker hian wrestling a luhchilh tan tirhin The Master of Pain tih a inphuah a, hemi hnuah hian Texas Red tiin a hming a thlak leh a. The Punisher, Punisher Dice Morgan, Commando leh Mean Mark Callous tih te a pu leh a, chumi hnuah Kane The Undertaker tiin a thlak leh a, hetiang hun lai hian Kane chu a la tel ve lo hrim hrim a, tuna a hming hi pariatna a ni.

Bike ngaisangtu
The Undertaker hian WWE arena chu bike khalh chungin a luhchilh fo a, bike hi a ngaisang em em reng a. Harley Davidson bike a lei khawl bakah West Coast Choppers ho bike siam a nei nual bawk a ni.

1991 Survivor Series-ah Hulk Hogan hnehin WWF Championship title a la a, hemi tumah hian a bike hmasa ber a lei a, bike hi a atchilh chho ta a ni.

The Eggman
Hming pariat a neih thu kan tarlang tawh a, hming pakua a nei teuh hle a, 1990 Survivor Series-ah khan The Eggman tia inlan turin ruahmanna an siam vek a. WWE ngaisangtute chuan he ruahmanna hi an duh lo hle a, an sawisel nasat tak em avangin an thil tum hi an thlak danglam ta a, The Undertaker chuan hming pakua a neih loh phah ta a ni.

Basketball lamah
Wrestling chauh a thiam lo a, The Undertaker hian basketball te pawh a hnehsawh ve viau a. WWE lama a luh hma hian basketball player a ni thin a, Fort Worth-a Texas Wesleyan University team player a ni thin.

Basketball a khelh thin lai hian kut dinglam hmang thiam zawk mahse a kut veilam hmanga shot a neih thin chu a larpui thei hle a. Basketball lamah hian ei zawng thei tur a nih laiin pro-wrestling lama kal hi a thlang ta zawk a ni.

Tlawm duh lo
A hun laiin The Undertaker hi a tlawm duh ngai lo a. Vawi tam tak chak lo ve tawh mahse vawi khat mah a tlawm duh lo a. Amah hian submission move a nei ve a, mi lakah submission hmanga chak loh chu a tum lo hle a, a tap out ngai lo bawk a ni.