WWE legend The Undertaker chu wrestling khawvel atangin a inthiarfihlim dawn ta niin an sawi a, tun hnaiah social media lama WWE kaihhnawih thil a dah pawh a paih bo vek a ni.
The Undertaker chuan hun rei tak chhung chu wrestling ngaisangtute mit leh beng a titlai ve tawh a. Amah vanga WWE ngaihsan phah pawh tam tak an awm tawh a, a kum te a tam chhoh ve tak avangin a duhtawk tawh niin a ngaih theih.
Wrestler zinga pa ber pawla ngaih thin The Undertaker hi a hming tak chu Mark Callaway a ni a, ruahman lawk dan chuan May 25 hian Starrcast II wrestling convention an nei dawn a, hetah hian inlan tura beisei a ni a. Hemi tuk chiahah hian an elpui AEW chuan Las Vegas khawpuiah tho Double or Nothing show an buatsaih ve dawn bawk a ni.
Kum 53-a upa Undertaker hian engmah a la sawi chiang chuang lo a, tun hnaia social media lama WWE kaihhnawih thil a tihbo tak vek avangin chawlh zui a tum niin an ngaih phah a. WrestleMania 35 leh Saudi Arabia lama WWE in hun an hman turah pawh Undertaker hming hi a lan loh avangin a chawl dawn niin an ring nghet vek tawh hlawm a ni.
Wrestling Observer Newsletter editor Dave Meltzer chuan, “Kar khat kaltaah kha chuan WrestleMania leh Saudi Arabia lama hun hman turah Undertaker hi a tel lo ve ve a. Hetiang show lian pahnihah pawh a hming a lan loh chuan wrestler ang chuan a inlan tawh dawn lo niin a ngaih loh theih loh,” a ti.
WrestleMania 33 ah Undertaker hian Roman Reigns chu a hneh lo a, a chak loh hnu hian ring chhungah chuan a jacket, a kutkawr leh a lukhum te chu a dah a. Hetianga a tih avang hian chawlh a tum zui niin an ngai vek hman a, mahse nikum khan Showcase of the Immortals ah a inlan leh a, John Cena chu a hneh zui a ni.
John Cena a hneh hnu hian Greatest Royal Rumble, Super Show-Down leh Crown Jewel ah te a inlan zui leh bawk a. Wrestling ring chhunga a inlan hnuhnun berah chuan a unaupa anga chang Kane nen an tang dun a, Triple H leh Shawn Michaels te chu an hneh lo a, hemi hnu hi chuan Undertaker hi ring chhungah hmuh tur a awm zui ta lo a ni.
1990 khan The Undertaker hian WCW atangin WWE a zawm tan a, entertainment sports khawvelah chuan a ropui ber pawl a ni chho a. Hall of Fame a tel Hulk Hogan, Ric Flair, Stone Cold Steve Austin, The Rock leh Randy Orton te chu a khum chho hlawm a. WrestleMania ah pawh 24-2 record a nei thei ngat a ni.