The Simpsons episode hi ka ngainat em avangin thangkhat lian zet ka lo en ve ta a, Matt Groening siam he animated sitcom hi TV-a series tihchhuah rei ber a ni ta a, season 27 leh 28 pawh kan hmu leh dawn e.
December ni 17, 1989 atanga tihchhuah tan kha niin, nikum September ni 28 atang khan season 26-na tan a ni a, fiamthu tha tak tak leh thu dik deuh deuh tarlanna a nih avangin tun thleng hian fans a neih belh zel a ni.
Nikum kum tir lam khan Season 25-a Episode pakhat Episode 16 "You don't have to live like a referee," tih chu FIFA 2014 World Cup denchhena siam ni ngei turin an tichhuak a, hetah hian FIFA chu eirukna bawlhhlawh tak chuan thuk takin a tihbuai thu tarlan a ni. FIFA official-te eirukna thubuai vanga chhui an nih chhoh takah chuan kha episode kha ka ennawn leh a, an lo tarlang dik chho angreng khawp mai ka ti hnuhnawh leh a.
Kumin May ni 27 khan Zurich-a FIFA president thlan a nih dawn ni hnih lekah FIFA executives te hotel-ah man an ni a, Sepp Blatter chu FIFA president atan thlan nawn ni leh mahse FIFA World Cup 2018 leh 2022 thleng tur vote thlaknaah inthamna lian tham tak a awm nia sawi chu chhuichian a ni a, FIFA mi pawimawh tak tak a awk chho mek. Khawvela pawl lian ber pakhat FIFA chu thamna leh eirukna vangin a hming chhe chho zel a, Blatter pawhin president a nihna a bansan ta hial a, FIFA chhungkua hi an buai chho zel dawn niin a lang.
Season 25 Episode 16 thawnthu tlangpui :
Springfield-a Lisa Simpsons-te school Principal Skinner chuan a naupangte chu,"My Hero" tih sawi turin a ti a. Lisa hi science lama tui tak a nih avangin a hero atana a sawi tum chu Madame Marie Sklodowskha-Curie a ni a, mahse Raphl chuan a lo sawi khalh ta daih si ! A sawi tur haihchham chuan a pa Homer Simpsons chu a hero a nih thu a sawi ta tawp a.
Lisa Simpsons chuan,"Mi lar a ni lo, history lehkhabuah pawh a hming a chuang lo, mahse ka chhuanna em em chu,'vawi khat kan inkhelh tumin referee-ah a tang a, mahse red card min pe tlat mai ka dive avangin. Soccer match-a mahni fate red card pe awmchhun a ni. Thil dik a duh a, chu chuan ka nun a siam tha a ni, chu chu Hero tih dan tur a ni," tiin a sawi.
Ralph leh Lisa te thusawi hi internet-ah an upload a, chu chu FIFA chuan an lo hmu fuh ta hlauh mai. FIFA World Cup 2014 chu Brazil-ah nghah a ni dawn a, eirukna leh thamna a tam em avangin mi dik FIFA chuan referee turin a zawng. FIFA Vice President chu Homer Simpsons-te inah a rawn leng hlawl mai le..
Khatih laia FIFA Vice President chu Jack Warner kha a ni a, FIFA Vice President chuan Homer Simpsons chu referee atan a sawm mawlh mawlh laiin eirukna vanga amah pawh man a nih mai tur thu a sawi zawh rualin FBI te chuan FIFA Vice President chu an rawn man ta nghal a ni.
FIFA World Cup 2014-ah Homer Simpsons referee-ah a tang.
Simpsons family te chuan Brazil an pan ta a. Brazil World Cup-ah chuan thamna a lo tam kher mai. Khawi hmunah pawh kal se Homer chu tham an lo tum a, a duh lo zel. Final-ah chuan Germany leh Brazil chu an intum dawn ta. Chutah zet chuan thamna lian tham tak a tawng ta. Brazil a ham chak chuan One Million dollar an pek tur thu an rawn hrilh. Sum tam tak a dawn dawn takah chuan Homer pawh chu a buai ta.
Final Second half-ah chuan Brazilian striker 'The Greatest master of the fake injury soccer has ever known', an tih kher El Divo chu box chhungah a dive. Penalty a ham a ngai ta. A ham chuan Brazil an chak thei dawn, mahse a fanu thusawi a hrechhuak a, Homer Simpsons chuan penalty pe ta lo chuan inkhel chu a chhunzawm pui a. Tichuan si hnih faiin Germany chu an chak a, 2014 Brazil World Cup -ah an champion ta a ni.
Matt Groening hian FIFA hi a lo hrechiang khawp mai tih he episode atang hian a lang chiang a. Tin, 2014 FIFA World Cup champion tur pawh an ti dik thlap thlap bawk a ni. He episode hian min ti hlim tak zet a, El Divo a rawn kal a, an inchibai a, a'n thal nghal ringawt te khan South America lama nat der an chin zia a tilang chiang hle bawk.