Game of Thrones vela The Mountain tia hriat lar, World’s Strongest Man title kawltu Hafthor Bjornsson chuan tluk loh a nei a, a title kawl chu a humhim thei ta lo.
Icelandic palian Hafthor Bjornsson hi Latvia lama piang, American Martins Licis chuan a khum a, kuminah khawvela pa chak ber niin, World’s Strongest Man title chu a la a. Nikum lamah chuan kum 29-a upa Martins Licis hi palina a ni pha chauh a, kumin tih lohah chuan nikum kha a thlen san ber a la ni bawk.
TV show lar Game of Thrones-ah khan kum 30-a upa Bjornsson hi Ser Gregor Clegane angin a chang a, kumina World’s Strongest Man thlannaah hian beiseiawm ber a ni leh a. Amaherawhchu, a ni khatnaah a inhliam nghal a, a kephah hnuailama tihrawl chu a thler a, heti chung hian a tawpah pathumna a la ni thei tho a ni.
The Dragon tia a hming lem an vuah, Martins Licis chuan The Mountain training a zawm thin a, kuminah Atlas stones-ah pahnihna ni ta Mateusz Kieliszkowski aiin a chungnung a, pakhatna hi a nih theih phah a. Polish pa Mateusz Kieliszkowski hi kumin leh nikum lamah pahnihna a ni ve ve a ni a. Vawi li champion tawh, kuminah pawh champion tura rin kai ber Brian Shaw chu pangana a ni.
Martins Licis hian a naupan lai atang tawhin khawvela pa chak ber nih hi a lo chak tawh thin a, chutiang hun lai atang chuan lung lian tak tak a lo chawi tan tawh a. Kum 29 a tlin hnuah a duhthusam chu a takah a chantir thei ve ta a ni.
Hafthor ‘The Mountain’ Bjornsson hi feet 6 leh inches 9 zeta sang niin, kg 190 bawr vela rit a ni bawk a. A hma chuan basketball player a ni thin a, mahse a ke rek a tihnat avangin basketball khelh chu a chawlhsan ta a ni.
Basketball khelh a chawlhsan hnuah hian Icelandic pa chak lar tak Magnus ver Magnusson nen an intawng a, 2008 a an intawn atang hian pa chak nih tumin a inbuatsaih chho tan nghal a ni.
2011 khan World’s Strongest Man thlannaah a vawi khatna atan a tel a, hemi tum hian parukna a ni thei a. 2012 hnuah kha chuan pathumna aia hniam a ni ngai ta miah lo a, heti chung hian nikumah chiah khan pakhatna chu a la ni thei thung.
2013 atangin Game of Thrones-ah a tel tan a, khawvel hriat a hlawh chho ve tan chiah a. The Mountain anga a chan hnuah hian film lar lutuk loah chuan a chang kual ve nual tawh a ni.
Kumin kum tir lamah khan Arnold Strongman Classic-ah Bjornsson hian deadlift record thar a siam a, kg 474 ngawt mai a chawi a ni.