21 May 2020 11:08

bakteaJr.

Mizo tlangval

The Last Dance

Infiamna khawvela hming dai tawh ngailo tur, a pheikhawk bun hnu pawh $560,000 man zeta an lilam, Michael Jordan leh a team khelhna Chicago Bulls chanchin ngaihnawm em em mai, The Last Dance chu tunhnaia entertainment khawvela mite en hlawh ber zinga mi a ni chho ta.

He documentary film series hi ESPN films leh Netflix tang kawpin an buatsaih a ni a, April 2020 ah release niin an chhuah tan phat atangin basketball fans mai nilo, sports ngainatute rilru a hneh nghal hle a ni.

1997-98 season chhung khan Chicago Bulls hian an team chettlatna zawng zawng chu film siamtute hnenah record phalna pe in, film siamtu lamin an zui kumtluan a; he documentary series hmuhnawm takah hian khawvel hmuha an la pho chhuah ngailoh, basketball court piah lama an nuna thil thleng tam tak pho chhuah a ni. Heng bakah hian ESPN hian Chicago Bulls nena inkungkaihna nei mi 100 chuang lai interview neiin an kawm kual bawk a, anni hian zep leh thup neilo in an ngaihdan ngaihnawm leh dengkhawng tak tak an sawi chhuak bawk a ni.

He series-ah hian episode 10 awmin, a vai hian chhuah kim a ni tawha, kum 2020 April thla ni 19 atanga chhuah tan niin, episode hnuhnung ber hi tun thla May ni 17 khan chhuah a ni.

1990s chho a Chicago Bulls ropui vanglai hmuhnawm tak karah an team a mi pawimawh em em Michael Jordan, Scottie Pippen, Dennis Rodman leh an coach hmingthang Phil Jackson te mimal nun chhui chhoh a ni a. Basketball khawvela mi hrat khawkheng ni tura Michael Jordan tumruh zia leh a thawhrim zia te, chhungkaw harsatna tam tak kara Scottie Pippen zinkawng leh player thinchhia leh maksak nia an sawi thin Dennis Rodman a mize bawr√° tak phena a hringnun khawngaihthlak zia te chu entute rilru khawihtu berte zinga mi a ni.

He minisiries hi inkhel.com chuan episode tete in a khaikhawmna ang deuh article chu rawn tih chhuah kan tum dawna, en ve thei lo te leh en hman ve lo te tan pawha a tlangpui tal an hriat ve theih nan he article hi rawn tih chhuah kan tum dawn a ni.