23 Sep 2020 04:50

inkhel

Tharum thawhna ka thlawp ngai lo: LeBron James

LeBron James chuan tharum thawh chungchanga an puhna phain, tharum thawhna chu engtikah mah a thlawp ngai loh thu a sawi.

United States chhunga chi inthliarna duh lohna lantirnaah LeBron James chuan a ngaihdan a sawi chhuak tawh a. Hetianga a tawng chhuahnaah hian police te laka tharum thawh a duh tih a sawi chhuak niin tun hnaiah an puh a, hei hi a pha nasa hle.

Los Angeles Lakers star James hi kumin May thlaa Minnesota khuaa George Floyd thihna chungchang leh thla hmasaa Wisconsin khuaa Jacob Blake kahhlum chungchangah khan a tawng chhuak a. Chi inthliarna te, vun rawng vanga inhmuhsitna te chu theihtawp chhuaha do zel a tum a, hetiang dona kawnga hma latu langsar pawl a ni.

James chuan, “America rama mihangte chuan kan rama thil thleng hi kan hlau a, kan ti em em mai a. Mipa, hmeichhia leh naupangte chuan kan hlau vek a, kan thla a muang lo hlawm hle a. Police ho hian eng rilru nge an put tih hi kan hre lo a, kan chungah eng thil nge thleng dawn kan sawi thei si lo a, huaisen a harsa a ni,” a ti.

Mipui hriata a ngaihdan a sawi chhuahnaah hian police laka tharum thawhna lampang sawi mawi anga an puhna chu mak a tih thu sawiin, engtikah mah tharum thawhna hi a la thlawp ngai loh thu a sawi chhuak a ni.

“Kum 35 ka tling ve tawh a, ka dam chhung hian engtikah mah tharum thawhna hi ka la thlawp ngai lo a, ka thlawp ngai bawk lo ang a. Mihang awm khawmna hmuna seilian ka ni a, hei vang hian thil dik leh dik lo chu ka thliar hrang thiam ve khawp mai,” tiin a sawi.

“A nihna takah chuan kan vun rawng avang hian mi tam takin min en dan a dik lo fo a, kawng tam takah en hran kan hlawh ngun hle a. Ka hriat theih tirh atangin hetiang thil hi ka tawng tawh a, tun thleng hian a la reh miah lo a ni,” a ti bawk.

A sawi zelnaah, “Police zawng zawng hi an sual hran lo a, tlema fuh lo deuh bik hi chu an awm zel thung a. High school kal lai atang tawhin tun thlengin an bulah ka khawsa nasa a, fel tak tak an tam mai,” a ti.

“Tun hnaia mihang chunga thil thleng hi kan duh lo em em a, chutih rualin tharum thawh zawnga hma lak chi a ni lo a, kan tih theih ber chu kan duh lohzia kan sawi chhuah hi a ni a. Police lakah tharum thawh duh angin vawi khat mah ka la tawng chhuak lo reng reng,” tiin James chuan a sawi a ni.