14 Aug 2019 01:52

bakteaJr.

Mizo tlangval

​Tha ber tura ka ngaih ka thlang mai – Lampard

Chelsea manger thar Frank Lampard chuan tun season-a an game hmasa berah player naupang zawk te chu Manchester United lakah inkhel bul a tan tira, Chelsea chhulchhuak pahnih Tammy Abraham leh Mason Mount-te chuan United lakah hian inkhel bul tanin, Mount-a Premier League game hmasa ber a ni nghe nghe.

Lampard leh a naute hi si li faiin an tlawma, player naupang zawkte khel tha thawkhat mahse an naupanna a la lang pawh a tih theih awm e. Lampard hian mi thenkhat atangin dem pawh a hlawh a, Chelsea manager hlui Jose Mourinho ngei pawhin Lampard-a team thlan dan chu a duhkhawp loh thu a lo sawi tawh.

Lampard chuan kum en lovin, a tha tur bera a ngaih angin team a thlan chhuah mai thu a sawi ve thung. Lampard chuan , “Squad chungchangah; player tawnhriat nei leh nei lo thlan chungchangah player-te kum ai mahin team a that theih dan tur berin player ka thlangchhuak mai zawk.

“Player naupang zawkte hian training-naah an theihna an lantir chuan inkhelhna chance neih an phu a; Mason Mount pawh kha la naupang hle mahse inkhelh a phu a, a khel a nimai. Player naupang chhawr hi ka tim dawn lova, a chhan chu player naupang chhawr tam hi Chelsea ang club tan hian a pawimawh a, mahse player naupang te hian inkhel tlak an ni tih an lantir a ngai a ni,” a ti.

Sawi belh zelin Lampard chuan, “Kan team khelhdan thlir chuan, United lakah ball kan chan loh laia tharum kan ngah zia te kha a tha ka ti hle a, ball kha kan chhuhsak ngun em em a, mahse kan hun tha neih te goal-ah kan chantir theih lo, kha kha kan chak loh chhan a ni,” a ti bawk.

Chelsea hian zanin zanlaiah UEFA Super Cup an khel dawn a, Europa League champion lai an nih angin Super Cup-ah hian Champions League champion lai Liverpool an hmachhawn dawn. Lampard-a hnuaiah Chelsea hian competitive game pakhat chiah an la khel a, Manchester United bak an la tum lo.

Lampard chuan zanina an tum tur Liverpool chu United nen an inan loh tur thu sawiin, “Kan insiamrem thiam a ngai a, kan tumpuite thiamna kan zah sak a ngai bawka, Liverpool leh United hi an inang dawn lo. Kan khelhdan tlema zawng kan ti danglam maithei a, mahse ball kan chan tam tir dawn emaw kan box chhungah defensive game kan khel dawn tihna a ni chuang lo. Kan tum ber tur chu ball kan hloh in neih let tumin rang tak leh taima takin kan bei zel dawn a ni,” a ti.