Carlos Tevez, Cristiano Ronaldo leh  Wayne Rooney-te inkawp kha an hlauhawmin, cheat code hmang ang mai an nih thu  Aston Villa striker hlui Gabby Agbonlahor chuan a sawi.

Tevez hian kum 2007 khan kum 2 chhung atan loan-in United a zawm a, hemi hma lawk hian West Ham-ah tha takin a che bawk.

Old Trafford-a a cham chhung khan Argentina international hlui hi a khel hmuhnawm thin hle, a hnu lawkah United elpui ber Manchester City a zawm chhunzawm bawk.

Ronaldo leh Rooney-te kiangah a khel thin a, an pathum khan United nawr kaltu an ni thin. An khelh ho hmasak berah United chu Premier League-ah leh Champions League-ah an champion nghe nghe.

An season hman ho vawihnihna leh a hnuhnung berah top-flight title dang an hlawhchhuak leh a, League Cup, Club World Cup leh Community Shield-te an hlawhchhuak a ni.

2007/08 season chhunga an trio goal belhkhawm kha goal 79 lai a ni a, season dawt lehah goal 61 an khung leh bawk. 

Gabby chuan a ngaihtuah let leh chang hian, an elpuite tana hmachhawn an harsat thin tur zia kha a hre chiang a, fiamthu thawh nan a hmang let nghe nghe.

"Ronaldo, Rooney leh Tevez-te khel ho kha chu gaming-a cheat code hmang ang mai an ni. An tha lutuk a, tehkhin theih an ni lo. An rang a, an chak bawk.

"Tevez khan goal a khung thei a, club dang tan pawha a awhawm thin hle a nih kha,"tiin Gabby chuan a sawi.

United fan-te tan lungawi thlak loh takin Tevez chuan kum 2009 khan City a zawm a, kum 2010 khan FA Cup champion puiin, kum 2012 khan Premier League title a lakpui bawk. Tevez-a hoin City chuan kum 44 hnua an league title hmasa ber an hlawhchhuak a nih kha.

"Lyon atanga John Carew kan lak luh khan ka lawm viau a, ka player hmuh tawhah chuan a tha ve thlawt.  A lian a, a chak bawk. A pet na em em a, Villa a zawm khan ka lawm em em a ni. 

"Ka phur a, kan thawhdunna a tha hle bawk. Ani nen khan a vanglai hun tam zawk hman dun ka chak,"tiin Gabby chuan John Carew chungchang a sawi bawk.