Manchester City leh Manchester United striker hlui Carlos Tevez chuan kum 38 mi niin inkhelh a chawlhsan thu a puang ve ta.

Kum 2021 kum tir lam khan Tevez-a pa hi a thi a, Argentine striker hian a pa thihna chu inkhelh chawlhsan tura thutlukna a siam chhan ber a nih thu a sawi.

Tevez chuan, “Ka retire ve ta a, a chiang vek tawh. Offer tam tak ka dawng a, United States lam atang pawhin dawrtu ka nei a, mahse ka theihna zawng zawng ka seng tawh a, a tawp tawh. A hma kum pawh khan inkhelh harsa ka ti tawh a, mahse ka pa ka la hmu thin a, tunah erawh ka number one fan ka chan tak avangin ka chawl ta a ni,” tiin inkhelh a chawlhsan thu a sawi.

Premier League lamah Tevez hi kum 2006 atanga kum 2013 thleng kha a khel a, kum 2006-07 season khan West Ham chu relegation lak atangin a chhanhim a, hemi avang hian a lar zual phah hle a, hemi season zawh hian Manchester United-in an lalut chhunzawm.

Kum 2009 khan United chhuahsanin, United hmelma lian Manchester City a zawm leh a, hemi tum pawh hian boruak a nei leh hat. United hi season hnih chhung atan Tevez hian loan-in a pan a, a loan contract a zawh hnuah United hian a ngheta lakluh tum mah se, City zawm a thlang ta zawk a ni.

United tan Tevez hian Premier League title pahnih, Champions League nomawi pakhat bakah, League Cup pakhat leh FIFA Club World Cup pakhat a chawi bawk a, City tan hian Premier League title leh FA Cup nomawi pakhat ve ve a chawi bawk.

Kum 2013 khan City atang hian inpu chhuakin Juventus a zawm a, hemi hnu hian a chawr chhuahna club Boca Juniors chu vawi hnih zawm lehin, Chinese club Shanghai Shenhua tan pawh a khel. Tevez hian a career-ah club tan game 746 khelin, goal 308 a khung a, a ram Argentina tan vawi 76 inlanin goal 13 a khung bawk a ni.