Terry-a'n Mourinho a ringtawk.

05th October 2015, 06:10AM

Chelsea captain John Terry chuan an manager Jose Mourinho chu hun khirh tak an hmachhawn mek atanga khaichhuak thei tura tha ber anih thu a sawi.

Portuguese manager Mourinho hian Inrinni zana Southampton an hnehloh hnu khan a hna bansan a tum lo tih a sawi a, London club hian an ban duh anih chuan tlanchhiat a tum loh thu a sawilang bawk.

Tun season Premier League-a 16-na ni mek Chelsea hian beisei an pha lo takzet a, mahse John Terry chuan an pu hi ala ringtawk hle thung.

England national team captain hlui terry hian, "Tuna kan huntawn mek atanga min khaichhuak thei hi a awm anih chuan Jose Mourinho hi a ni ang."

"Manager tha ber kan nei a, a hnung kan dawl a kan tangrual." tiin a sawi.

Southampton an hneh zawhloh hnuin Chelsea hian tun season Premier League-a game riat an khelh tawh atangin game liah hnehloh an tawng ta a, Mourinho dinhmun hi a nghet tawh lo niin tarlan tan a ni.

Sawi chhunzawmin kum 34 mi Terry chuan, "Inrintawkna lamah kan hniam a, mahse player kan nei tha tawk a kan dinchhuah ngei angai a kan dingchhuak ngei bawk ang."

"International break zawha Aston Villa kan mikhual hunah chak ngei ngei a ngai a, hei hi kan dinhmun siamthat nan a ngai thei tlat. Vawikhat chak chuan dinhmun hi a siamthat theih a ni." tiin a sawi.

Mourinho enkawlna hnuaiah Chelsea hian Premier League nomawi vawithum an chawi tawh a, mahse tun season-ah erawh tunhmaa Mourinho enkawl thin Chelsea kha an ang thei tak tak rih lo.

Copyright © inkhel.com 2024. All rights reserved.