Roger Federer chu kumin kum tawp hmain tennis khel zinga billionaire hmasa ber ni thei tura beisei a ni.

Swiss superstar, vawi 20 zet Grand Slam title lo la tawh, tunah pawh khawvela mipa tennis player zingah chuan No. 3 ni mek chu 2020 ral hmain billionaire a nih hman ngei an beisei a. Tennis khawvela a luh hnuah $129 million zet chu singles leh doubles inelna atangin a dawng tawh a ni.

Tun dinhmunah chuan mipa infiammi zingah billionaire hi pathum chiah an la awm a, Michael Jordan, Tiger Woods leh Floyd Mayweather te chauh an la ni a. Heng mi pathumte huangah hian Roger Federer pawh a awm ve thei teuh tawh hle niin an sawi.

Federer hian a inkhelhna atang hian sum a hai luh hnem viau rualin, hemi piah lama a sum lak luh lakah chuan a beitham hle a. Fakna leh sponsorship vel atangin a la lut hnem hle a, Forbes in kum khat chhunga a sum lak luh an chhutnaah chuan kum khat chhung ringawt pawhin $93.4 million vel zet chu a la lut niin an sawi a ni.

Company lar tak takin Roger Federer hi an sponsor nasa hle a, Barilla, Credit Suisse Group, Mercedes-Benz, Rolex, Uniqlo, Wilson Sporting Goods te leh a dang tam tak nen an inthlunzawm mek a ni.

Infiamna bungraw siamtu lar Nike chuan Roger Federer hi an thlun zawm mek bawk a, tennis khelh laia a pheikhawk bun an sponsor a, hemi atang ringawt hian Federer chuan $900 million dawn chu a dawng tawh niin TENNIS.com chuan an tarlang.

Kumin kum tawp hma ngeia Federer hi billionaire a nih hman chuan tennis player zingah chuan hetiang dinhmuna ding thei hmasa ber hi a ni dawn a. Kum 38-a upa tennis legend hi 2020 Australian Open khel turin Melbourne khawpuiah a inpuahchah mek a ni.