Tun hnaia Forbes in The World’s Highest-Paid Athletes an thlan chhuahah Roger Federer chu tennis player zinga sum la lut hnem ber a ni.

Roger Federer hi khawvela tennis player zingah chuan sum hai lut hnem ber a ni zawn rei ta hle a, kumin hi tennis player zingah sum hai luh hnem lama a zawna kum 14 chhung a sang ber a nihna a ni ta a. Federer tih lohah chuan hetiang dinhmun luah thei hnuhnung ber chu Andre Kirk Agassi a ni.

A pumpuiah chuan Lionel Messi chu khawvela infiammi zinga sum hai lut hnem ebr niin, a sum lak luh zawng zawng chu $127 million niin, a dawt chiahah hian $109 million hai luttu Cristiano Ronaldo a awm bawk a, pathumnaah $105 million la luttu Neymar Jr a awm bawk.

Tun tuma infiammi sum hai lut hnem zual an thlan chhuah zingah hian tennis player zinga sum la lut hnem zual panga han thur chhuak ila. Panganaah chuan Serena Williams a awm a, Forbes ranking bikah chuan 63-na daih niin, a sum hai luh zawng zawng hi $29.2 million a ni.

Serena Williams hi Wimbledon 2019 final-ah chak ta lo mahse khawvela hmeichhe tennis player zingah chuan sum hai lut hnem ber a la ni tho a. Inkhelhnaa a dawn zawng zawng chu $4.2 million niin, a bak $25 million chu fakna vel atanga a lak luh a ni.

Rafael Nadal chu palinaah a awm a, Forbes ranking thar berah hian 37-na a ni a, a sum hai luh zawng zawng belh khawm chu $35 million a ni a. Heng zinga $26 million chu sponsorship atanga a hmuh niin, inkhelhna atanga a sum lak luh hi $9 million a ni.

Nadal hian kum hmasa lamah inkhelhna atangin $14.4 million a la lut thei a, tun tumah hian a pawisa dawn chu a tlakhniam avangin a hmaa pahnihnaa awm kha palinaah a tla ta daih a ni.

Kei Nishikori chu pathumnaah a awm a, Forbes ranking-ah chuan 35-na a ni a. Kum khat chhunga Kei Nishikori sum lak luh zawng zawng hi $37.3 million a ni a, inkhelhna atang chuan $4.3 million chiah a la lut a, a dang $33 million chu sponsorship atanga a hmuh a ni.

Kum 29-a upa Nishikori hi World No. 4 dinhmunah te a ding chho thei a, Japanese mipa tennis khel thin zingah chuan singles Top 5 huanga awm thei hmasa ber a ni.

Novak Djokovic chu pahnihnaah awmin a sum hai luh zawng zawng chu $50.6 million a ni a. Forbes ranking tharah chuan Djokovic hi 17-na a ni a, $20.6 million chu inkhelhna leh hlawh atanga a hmuh niin, Lacoste, Asics leh Seiko tih vel atangin $30 million chu a hmu a ni.

Roger Federer chuan kum khat chhungin $93.4 million a la lut a, hei vang hian khawvela tennis player zingah chuan sum hai lut hnem ber niin, Forbes ranking-ah chuan 5-na a ni.

Swiss maestro Federer hian inkhelhna leh hlawh vel atangin $7.4 million a la lut a, fakna vel neuh neuh atangin $86 million zet a la lut thung a. Infiammi zingah chuan fakna leh sponsorship vel atanga sum hai lut hnem ber a la ni reng a, Lionel Messi ($35 million) leh Cristiano Ronaldo ($44 million) te lak luh belh khawm ai pawhin a hmu hnem zawk a ni.