24 Jun 2019 07:33

inkhel

Tennis lalnu thar Ashleigh Barty

Ashleigh Barty chuan Pathianni khan Julia Goerges a hneh a, Birmingham WTA title lain, Australian star hi World No. 1 thar a ni.

French Open champion Ashleigh Barty hi Australian tennis player zingah chuan World No. 1 ni thei hmasa ber dawttu a ni a. 1976 khan Evonne Goolagong Cawley chu World No. 1 a lo ni tawh a, hemi hnuah hian a chungnung ber ni thei hi an awm leh mai tawh lo a, Barty hi a rawn ni ve leh thei ta chiah a ni.

Barty hi Australian star, World No. 1 lo ni tawh John Newcombe, Pat Rafter leh Lleyton Hewitt te huangah a awm ve thei ta a. Tennis Australia chief Craig Tiley chuan thil ropui tak leh chhinchhiahtlak tak a nih thu a sawi.

Craig Tiley chuan, “Khawvela a chungnung ber nih hi thil harsa tak a ni a, a duh nazawng tana puitlin ngawt theih a ni lo a. Ashleigh Barty thil tawn hi a ropui a, ka lawmpui tak zet a ni,” a ti.

“Barty hi ka mi hriat a ni a, a inngaitlawm hle a, World No. 1 a nihna pawh hi chuti vakin a chapopui hauh lo ang tih pawh ka hre chiang a. Amah hi chuan tennis court chhunga chet leh vat a, tha taka khelh theih tluka duh a nei lo ang,” a ti bawk.

Goolagong Cawley chuan, “Ash hian World No. 1 nih hi a phu hliah hliah a, French Open title a lak khan mahni inrintawkna pawh a neih nasa phah sauh a rinawm a. Aboriginal player dangin World No. 1 nihna a chelh leh thei hi lawmawm ka ti a, ka chhuang hle a. A thlen chin apianga lungawi a lawm thei zel a nihna hian ka lawmna a tizual,” a ti.

Sydney khawpuia chanchinbu lar Daily Telegraph chuan Ashleigh Barty hi ‘tennis lalnu thar’ tiin a hming lem an phuahsak a. “A nungchang mawi em em mai hian amah min ngainat zualtir a, engmah sawisel a nei ngai lo a, a thinrim hmel hmuh tur hi a awm ngai lo reng reng,” tiin an ziak.

“Barty hian Australian nih a tinuam a, kan chipui a ni tih hi chhuang taka sawi pawh a nawm phah em em a. A dam khua sei mawlh rawh se,” an ti bawk.

Mi chi hrang hrangin Japanese star Naomi Osaka khuma World No. 1 ni thar Ashleigh Barty hi an lawmpui thu an sawi chhuak a, heng zingah hian Billie Jean King pawh a tel.