Maria Sharapova chu kum zabi 21-naa hmeichhe tennis khel zinga lar leh hausa berte zinga mi a ni a, kum 32-a upa niin tennis khelh a chawlhsan thu a puang.
Grand Slam singles title vawi 5 la tawh Maria Sharapova hian Nilainiah Vanity Fair kal tlangin tennis khelh a chawlhsan tur thu hi a puangzar a. Tun hnaiah a inhliam fo avangin duh angin a inkhel tha thei lo thin a, hei vang hian chawlh mai hi tha zawka a hriat thu a sawi a ni.
Russian star Sharapova chuan, “Hetiang lampang hi ka tan chuan thil thar a ni a, min lo hrethiam hram ula. Tennis hi ka mangtha ta a ni,” a ti.
A vanglaiin Sharapova hi Grand Slam tournament paliah a champion vek a. Wimbledon, Australian Open leh US Open ah te vawi khat theuh a champion a, French Open ah chuan vawi hnih a champion bawk a ni.
“Ka chawlh thu ka puan chhuah hian lar ka tum vang leh mi khawngaih beisei vanga ti ka ni lo tih ka sawi duh a. Ka nihna dik tak puanzar ka duh vang zawk a ni a, ka taksa hian min tibuai ve ta em a ni,” a ti.
“Ka inkhelh chhung zawng khan tennis khelh hi manhla ka ti em tih zawhna hi chu chhan a harsa lo khawp mai a. A tawpah chuan a manhla zia kan hre chiang em em mai a ni,” tiin a sawi bawk.
Australian Open ah khan a inlan a, Grand Slam tournament-a a inlan hnuhnun ber a ni ta a. First round-ah Donna Vekic a hneh lo a, a tla nghal a, hei vang hian ranking-ah pawh No. 373 daih a ni.
World No. 1 pawh lo ni tawh Sharapova hi a dar na vangin a buai ngun hle a, tournament lian tham deuhah hian a chet that theih loh phah fo a. Hetianga a inhliam avanga beisei anga a chet theih loh fo avang hian chawlh mai thain a hre ta a ni.
Kum 6 mi a nih lai khan Sharapova chuan tennis a khel tan a, Russia atangin a pa Yuri nen Florida lamah an kal a. Martina Navratilova chuan Moscow khawpuia clinic an buatsaihah Sharapova thiamna hi a hmu fuh a, hei vang hian America ram lama training nei tur hian thurawn a pe a ni.
A inkhelh lai hian tour singles title 36 a la hman a, 2012 ah khan Olympic singles silver medal a la a, 2008 kumah khan Russia chu Fed Cup title a lakpui bawk a. August 2005 ah khan a vawi khatna atan World No. 1 a ni a, he dinhmun hi kar 21 chhung chu a luah thei a ni.