08 Sep 2018 12:26

inkhel

Tennis hmangin Mizo tlangval a invawrh sang mek

Mizo pa ngei infiamna lama hlawhtling an awm chhoh tawh nuk karah 2015 atanga eizawnna atana tennis lo hmang tawh Joseph Z Khuma erawh kan hre meuh hlawm lo. New Delhi khawpuia tennis academy, K12 (Khuma 12) Tennis Academy hlawhtling taka enkawl mek leh neitu Jojo Khuma chu Miss Deaf World (Europe & Asia) a India aiawh tur Nishtha Dudeja talent pholanna tur video clip shooting neihpui tura sawm a nih angin Thawhlehni khan Gurgaon-a K12 Tennis Academy-ah shooting a neihpui.

Miss India Deaf 2018 Nishtha Dudeja hi tennis lama tui em em mai niin, Delhi University zirlai a ni a. 2013 khan India ram aiawhin Sofia, Bulgaria-a Deaf Olympics neihah a tel a, 2015 World Deaf Championship-ah India ai a awh leh a, 2017 ah Deaf Olympics, Turkey-ah India ram tan a fehchhuak leh bawk.

2017 khan taksa lam harsatna avangin amah enkawltu doctor chuan tennis chawlhsan turin a rawn a, beauty pageant lamah a kal ta a, kumin February 2018 khan Miss India Deaf atan thlan a ni. India ram aiawha fehchhuak turin a inbuatsaih leh mek a ni.

Miss World Deaf 2018 hi Prague, Czech Republic-a September 29-October 2 chhunga neih tur a ni a, contestant te hian an talent neih that ber video clip thehluh a ngai a, hemi atan hian tennis thlangin Jojo Khuma hi amah pui turin management lam chuan an sawm ta a ni.

He video clip tawi, Miss World Deaf contest huna intihsiakna tur pakhat hi Nilaini khan K12 Tennis Academy hmun, Gurgaon-ah an siam a, shooting hi hlawhtling taka neih a ni.

K12 (Khuma 12) Tennis Academy hi August 2015 khan hawn tan a ni a, a tirah chuan St. Matthews School, Paschim Vihar-ah kalpui tan a ni. Kumin July atang khan K12 Tennis Academy branch thar Gurgaon, Haryana-ah hawn a ni leh a ni.

“Kan student langsar zingah chuan hmanni Aizawla Challenger Tennis League-a lo khel Vipul Mehta, Damini Hoon leh Ishpreet Kaur te kha an ni a. Tunah kum 11 rual mipa leh hmeichhia beiseiawm deuh deuh kan nei bawk a. Vipul Mehta hi India Junior Davis Cup player a ni a, junior level-ah India ram vawi hnih a represent tawh a. Damini Hoon hi American College NCAA Division 1 ah an coach ten an college tana khel turin an hual mek a ni,” tiin Jojo Khuma chuan a academy enkawl chungchang a sawi.

Mizo tlangval zingah eizawnnan football hmang leh hausakpui mek an awm laiin, tennis pawh eizawnnan leh hausakpui nan Mizo te tan kawng a inhawng a ni tih Joseph Z khuma atang hian a lang chiang hle a. Jojo Khuma hian New Delhi leh Gurgaon lamah academy pahnih a enkawl mek a, tunah hian Gurgaon-ah private student pahnih leh academy student 20 an awm a. St. Matthews Center-ah hian private student 2 leh academy student 21 an nei bawk a ni. Academy-ah hian private student naupang pakhat hian Rs. 45,000 an pe a. Gurgaon Centre-ah hian court hman man a pe lo a, private student pakhat hi a tennis court neitute an ni a, tennis court 5 an nei a, an zar a zo thei hlauh a ni.

St. Matthews, Paschim Vihar-ah hian thla khatah Rs. 40,000 in court pathum a hmang a. Academy student (Group coaching) te hoah hi chuan naupang pakhatah thla khat atan Rs. 10,000-15,000 an la a (an level a zirin). Coaching a pek hun hi Gurgaon Academy-ah zing lamah dar 7-9 chhung a ni a, New Delhi Center-ah chawhnu lamah dar 4-6:30 a ni bawk a. Tunah hian Mizo tlangval B. Lalruattluanga chu thawhpui (Coach) turin a hruai thla a, ani hian thla khat ah 40k vel la lut tura ngaih a ni.

"A tirah chuan midang academy-ah coach hna thawkin ka inhlawh ve thin a, mahse kei Mizo tlangval ngei hian Delhi-ah hian academy hi din theih inbeiseina ka neih chhoh hnuah Pathianin min tanpui a, tunah chuan mahni pualin academy ka nei chho ve ta hi Pathian chungah leh min support tu ka chhungte chungah ka lawm tak zet zet a ni,” tiin Jojo Khuma hian a sawi.

A sawi zelnaah, “Mizo tlangval ngei hruai thlaa academy kan han enkawl hian phurna nasa tak leh chona nasa tak min pe zual a. Delhi-ah hian tennis academy a awm nual a, keini Mizo tlangval pahnihin kan enkawl academy hi chutiang zinga tha ber nihtir hi ka vision a nih piah lamah, Mizoramah ngei pawh hian academy tha nei ila, chutiang te nen chuan inel ila tih hi ka dream leh vision a ni thin a. Mizoram leh India ramah tennis hian ngaihhlut a hlawh tawk lo a, mi hausa game-ah an ngai niin ka hre thin. Mahse, badminton aiin tennis hi a hautak loh zawk avangin a tui mite tan chuan hlawhtlinna kawng a inhawng reng a. India ram state tam zawkin an tih theih loh Mizoramin Tennis League kan han nei thei te hi a ropuiin a hlu tak zet a, tennis hmang hian Mizo te hian India ramah kan hnam kan chawisang thei a ni tih hi ka suangtuahna a ni fo thin," a ti bawk.