11 Jul 2020 05:26

inkhel

Tennis hi sum lak luhna atan a tha tawk: Federer

Roger Federer chuan tennis chu infiamna dangte ang bawka sum lak luhna tha tak a nih thu a sawi.

Swiss star Roger Federer hi kumina Forbes in infiammi sum la lut hnem an thlanah a vawi khatna atan pakhatna a ni a, chhiah pek hmaa a sum lak luh zawng zawng chu $106.3 million zet a tling thei a. 1990 atanga hetiang an tih hnuah Federer hi tennis player zinga No. 1 ni thei hmasa ber a ni.

Federer chuan, “Infiamna chi hrang hrangah hian an hlawh a sang thei hle a, a bikin football, boxing, Formula 1 leh basketball ah te hian player te hlawh a sang lehzual a. Chutiang a nih rualin tennis pawhin heng infiamnate a el pha ve thei hi thil lawmawm lampang niin ka ngai,” a ti.

“Sum lak luh lamah tennis in football, boxing, Formula 1 leh basketball te a el phak ve rual hian chanchinbu lama thil nih dan chiang zawk leh hming thlenga an tar lang thin hi chu a zahthlak ka ti ve deuh thin,” a ti bawk.

A sawi zelnaah, “A nihna takah chuan inkhelh boruak chu dah tha ta ila, sum lak luh kawngah hian tennis hi hmuh hniam chi a ni bik lo a, infiamna dangte ang bawkin sum lak luhna atan hian a tha tawk ve viau a ni,” a ti.

Season thar tan leh hunah Roger Federer chuan 100% a inpeih theih a beisei thu sawiin, coronavirus vanga inkhelh theih loh lai hian duhthusamin a awm hahdam hman thu a sawi a ni.

“Lockdown chhungin duhthusama rei Switzerland-ah ka awm thei a, hei hi ka tan chuan a lawmawm mai bakah a hlu hle a ni,” a ti.

“Kum 25 kal ta atang khan ka zin kual nasa em em mai a, a zawnin thla hnih chhung hi inah ka awm hman ngai lo hrim hrim a. Tunah chuan thla li, thla nga vel chu Switzerland ah kan la awm ngar ngar a, nuam kan ti viau mai,” a ti bawk.