Tennis Hall of Fame-ah Michael Stich leh Helena Sukova

19th July 2018, 11:07PM

Wimbledon champion hlui Michael Stich leh Grand Slam double champion thin Helena Sukova te chu Inrinni hian International Tennis Hall of Fame-ah lakluh an ni dawn.

German tennis star Michael Stich leh Czech Republic star Helena Sukova te hi Newport, Rhode Island-a ATP Hall of Fame Classic-a hun buatsaihah an lawmlut dawn a ni.

Kum 49-a upa Stich hian Grand Slam single title vawi khat chiah a la a, 1991 khan Wimbledon champion a ni a. Hemi tum hian an ram mi tho Boris Becker nen an inkhel a, straight in Michael Stich hi a chak a. 1994 US Open final-ah Andre Agassi nen an inkhel a, hetah hian a chak lo zawkah tangin pahnihna a ni a. 1996 French Open final-ah Russian star Yevgeny Kafelnikov a hneh lo bawk.

World No. 2 ni thin Michael Stich hi Boris Becker nen an inkawp a, 1992 Barcelona Olympic men’s doubles title an la a, American star John McEnroe nen inkawp lehin 1992 Wimbledon men’s doubles title an la leh bawk a ni.

Michael Stich hi tunah chuan Hamburg khawpuia ATP German Open director a ni mek a, a hun laiin singles final vawi 31 a lut a, hengah hian vawi 18 a chak a, 1997 khan tennis khelh a chawlhsan a ni.

“Tennis player ropui tak tak zinga min telh ve tur hi a ropui ka ti a, ka ngaihsan em em te nen huang khata han awm chu a zahthlak lek lek zawk a, a lawmawm dan hi ka sawi thiam lo a ni,” tiin Stich chuan a sawi.

Kum 53-a upa Helena Sukova chu kar 68 chhung ngawt mai hmeichhe doubles World No. 1 a ni thei a, Grand Slam women’s doubles title vawi 9 lain, mixed doubles title 5 a la bawk a. Doubles title a lak hi Wimbledon women’s doubles title 4, mixed doubles title 3 bakah French Open women’s doubles title 1, mixed doubles title 1, US Open women’s doubles title 2, mixed doubles title 1 leh Australian Open women’s doubles title 2 te an ni.

Singles bikah chuan Sukova hian a tawn san ber laiin World No. 4 a ni a, US Open final leh Australian Open final vawi 2 ve ve a thleng a. A hun lai hian singles title 10 a lak bakah doubles title 69 a la bawk a, 1998 khan tennis khel hi a chawlhsan a ni.

“Khawela tennis player ropui ber berte zinga min telh ve tur hi ka lawm tak zet a, kan ram hming ka titha thei hi lawmawm ka ti a ni,” tiin Sukova chuan a sawi.

Copyright © inkhel.com 2024. All rights reserved.