US Open tennis an khelh leh hunah chuan lawmman dawn tur pawisa fai chu a hma zawng aiin an tisang tawh dawn a, tennis tournament zingah chuan pawisa tamna ber a ni tawh ang.
United States Tennis Association (USTA) chuan kumina US Open khelh leh tura pawisa dawn theih zat chu an tipung a, a vawi khatna atan lawmman dawn tur pawisa zawng zawng hi $57 million aia sang a ni tawh dawn.
Kumina tournament an khelh leh hunah mipa leh hmeichhe singles champion te chuan $3.85 million ve ve an dawng ang a, mipa leh hmeichhe doubles champion te chuan $740,000 ve ve an dawng dawn bawk a. US Open khelh a nih tawh chinah chuan hetiang taka lawmman tih tam hi a la awm lo a ni.
Nilaithawhtan khan USTA chuan ATP leh WTA te nen an thawkho a, round tina pawisa an pek chhuah tur pawh an siam thar vek niin an sawi a. Tuna ruahmanna thar an siam hian Grand Slam tournament record thar an siam thei vek dawn niin an sawi.
Singles first round-a pawisa an hlan tur pawh $58,000 atangin a intan dawn a, WTA leh ATP tour player program atan $500,000 an pe thin dawn niin USTA hian an sawi bawk a. Kuminah lawmman dawn tur pawisa an tihpun hi 2018 nen a inthlau ve thawkhat viau a, a punna hi 8% vel lai a tling a ni.
First round bika (a vaiin 128) sum an pek chhuah tur punna chu kum li kaltaa an pek thinte nen khaikhin chuan 47% ngawt a ni a. Second round (a vaiin 64) bika an sum pek chhuah tur pawh 46% ngawtin an tipung bawk a. USTA hian US Open khel pha player zawng zawngte chuan hamthatna duhawm zawk an lak theih theuh an duh vanga ruahmanna thar hi siam an nih thu an sawi a ni.
US Open Qualifying Tournament khelh turah ringawt pawh lawmman dawn theih tur pawisa hi an tipung a, a hma aiin 20% ngawtin a pun belh a, a vawi khatna atan lawmman awm zawng zawng belh khawm chu $3.5 million a tling ve dawn bawk a ni.
Kumin August 19 atangin US Open Qualifying Tournament chu an khel ang a, August 26 atangin USTA Billie Jean King National Tennis Center, Flushing Meadows-ah US Open 2019 chu khelh tan a ni ang a, September 8 thleng an khel dawn a ni.