Manchester United Board of Director te chuan Erik ten Hag-a chungchang an ngaihtuah a, Dutch coach chu United manager la ni zel turin an duh tih BBC chuan a tarlang.

A contract a hman zawh hnuah pawh, chhunzawm leh theihna chungchang thlengin Board meeting chuan an sawi nia report a ni nghe nghe.

Premier League-ah 8-na niin season an khar, FA Cup-ah an champion emaw, champion lo emaw pawh nise, United chuan Ten Hag an ban ngei dawn niin media ten thu an vawrh darh a nih kha.

FA Cup final-ah 2-1 in Manchester City an hneh, khami hnu lawk khan Board te chuan ten Hag-a hma hun chungchang an ngaihtuah a, thutlukna an siam ta a ni.

United hotute hian coach dang pawh an be ngei niin a ngaih theih. Thomas Tuchel chuan United boss nih chungchang a ngaihtuah loh thu a rawn sawi chhuak hlawl a nih kha.

United hotute hian Ten Hag thlak tumna an lo nei ngei niin a ngaih theih bawk a, tunah erawh an inruai chhunzawm zel dawn ta a ni.