Manchester City defender John Stones chuan an Premier League title humhim zo lovin, Liverpool chu champion fel tawh mahse City chu England-a team tha ber an la nih reng thu a sawi.

City hian an Premier League title humhim zo lo mahse tun season-ah trophy chawi theih pahnih an la nei a, Champions League leh FA Cup lamah te rinkai ber zinga mi an ni a tih theih awm e.

Kum 26 mi Stones hi tun season-ah hliamin a tlakbuak deuh reng avangin a inkhel mumal lo hle a, City game hnuhnung bera 5-0 a Newcastle an hneh tumah erawh Stones hi a inlan ve leh thei.

Stones chuan, “Newcastle laka ka khel thei kha ka tan chuan a lawmawm zual hle a, Premier League-ah champion awm tawh mahse trophy dang la turin kan la bei mek.

“Team tha ber kan la ni renga, kan theihna kan hria a, dressing room lama standard kan set kan hre chiang. Ni thum emaw ni li emaw dana standard sang taka khelh ziah hi thil namai a ni lova, inchhuanna tham a ni a, chutianga tih zel chu kan tum bawk.

“Tun season hi khelh zawha, season thar hmachhawn kan chak tawha, ka standard tihsan reng a pawimawh a, a hma aia hmasawn tum zel kan ngai hle a ni,” a ti.