Barcelona leh Real Madrid te chuan Supercopa de Espana final-ah El Clasico match an khel dawn a, penalty shoot-out hmanga Barca a chakpui avangin Xaxi chuan an goalkeeper Marc-Andre ter Stegan lakah a lawm bawk.

Barcelona manager Xavi chuan Supercopa final-a Real Madrid an hmachhawn tur chu a lawm a, hmachhawn a chak tawh thu a sawi a ni.

Ningani zan zanlaiah khan Barca hian final lut tur hian semi-final ah Real Betis nen an inhmachhawn a, hun pangngaiah leh extra-time ah 2-2 a an inhnehtawk avangin penalty shoot-out hmangin chak zawk zawn a ni a, Barca hi vannei zawkah an tang.

He inkhelah hian Robert Lewandowski chuan Barca tan goal hmahruai rawn khungin, Real Betis forward Nabil Ferik chuan an si phur a rawn sut ve leh a, hun pangngaiah 1-1 a nih avangin extra-time khelh a ni. Extra-time ah pawh hian Barca bawkin Ansu Fati goal thun hmangin hma rawn hruai leh mah se Real Betis bench atanga lo lut an striker Loren Moron chuan a rawn sut ve leh a, 2-2 in an inhnehtawk.

Penalty shoot-out hmanga chak zawk zawnnaah hian Barcelona goalkeeper Ter Stegan chuan Juanmi leh William Carvalho te pet a dansak ve ve avangin final-ah El Clasico kan hmuh theih phah dawn a ni.

Barca hmachhawn tur Real Madrid hian semi-final ah Valencia an hmachhawn a, anni pawh hi hun pangngaiah leh extra-time ah 1-1 a an inhnehtawk avangin penalty shoot-out hmanga chak zawk zawn ve tho a ni a, Real Madrid hi penalty-ah hian 4-3 in an chak ve bawk.

Supercopa final an luh hnuah Barca boss Xavi chuan, “Final khelh chakawm tak a ni, he title la ngei thei turin kan khel ang. Team tha ber hmachhawn a, hneh hi ka chak ber a ni.

“Nomawi (Trophy) a ni a, a pawimawh dan a danglam lo. Season khelh mek thlak danglam dawn lo mah se phurna leh inrintawkna tun season kan la khelh leh turah hian min pe thung ang. Engpawh thleng se kan hmabaka title pathum awm hi la vek thei turin kan bei ang,” tiin a sawi.

Betis laka hnehna chanpuitu Barca goalkeeper Ter Stegan chu Xavi hian fakin, “Helai hmuna ka awm tirh te atang khan ani hian min tilawm a, a tel ve hian a famkim a ni,” tiin a sawi bawk.

Supercopa de Espana final hi tun Pathianni zan dar 12:30 a khelh tur a ni.