Premier League champion lai Machester City manager Pep Guardiola chuan tun Premier League season lo awm turah hian season hmasa angin team hnih chiah champion turin an inum tawh dawn lo tih a sawi.

City hian kum hnih chhung England-ah ro an rel tawh a, nikum khan Liverpool nen intum tawk hle in a tawpah point khat chiahin City hi an champion a, an pahniha an that fal zia chu kan hre theuh awm e.

Season liamta khan City hian point 98 lai an hmua, an hnuai chiaha awm Liverpool chuan point 97 an hmu ve thunga, pathumnaa awm Chelsea chuan pahnihna Liverpool hi point 25 laiin an pha lo.

Guardiola chuan, “Liverpool nen season hmasa khan standard kan set sang hle a, champion tum ve dangte hian kha chona kha an hmachhawn a ngai. City leh Liverpool chuan khatiang tak khan a chet that theih tih kan lan tir tawh a, midang pawh hian an tum ve a ngai dawn. Team dang te dinhmun leh quality neih en hian an thei tih ka hria a, season hmasa ang ngawt chu a ni tawh dawn lo. Team hnih chiah kan inum tawh lovang,” a ti.

City hian season liamta khan England-a trophy lian an lak theih zawng zawng chu an la veka, Premier League-a an champion bakah FA Cup leh League Cup an chawi bawk. Guardiola chuan kum dang ang bawkin Premier League chawi chu an dah pawimawh ber tur thu a sawi.

Guardiola chuan, “Game 38 khelh tur a awm a, England-ah hian game tin mai hi a harsat em avangin league-a champion pawh hi a nuam em em a ni. Premier League-ah kan che tha a nih phawt chuan competition dangah pawh kan che tha tihna a ni a, harsa taka kan champion-na hi an hlu em em a, chuvang chuan Premier League-a champion pawh hi a nuam ber a ni,” a ti