Mi lar hrang hrang zingah an taksaa tattoo chhuttir an thahnem viau mai a, tlema mi hriat an hlawh hnua ziah belhtir pawh an awm teuh tawh a. Thenkhat chuan an lar hma atang tawhin tattoo chhut hi an buaipui ve bawk a, an taksa hmun hrang hrangah milem hmuh tur a awm nual hlawm a ni.

Cristiano Ronaldo chu khawvela footballer ropui ber ti hiala sawi a ni a, khawvel pum puiah pawh hre lo an tam lo viau ang tih theih a ni. Hetiang khawpa a lar chung hian mi tih ang tih ve duh miah loh a nei a, a taksaah tattoo a chhuttir ve duh lo a ni.

Portuguese superstar Cristiano Ronaldo hi mi invawng uluk tak mai a ni a, a taksa a enkawl ngun a, taksa nalh leh fit tak a neih reng theihna turin theihtawp a chhuah fo thin a. A invawn peih em avangin khelmualah pawh mi tluk loh a nih theih phah reng a ni.

A kum a tam chho ve tawh a, chuti chung chuan Ronaldo hi footballer naupang zawk tam takin an la tluk chuang lo a. Mi invawng uluk a nihna piah lamah a taksa khawi laiah mah tattoo a chhuttir duh loh chhan hi a ropui a, thil zahawm tak a tling ve tlat a ni.

Juventus forward Cristiano Ronaldo hi mi tanpui kawngah a inhmang nasa em em mai a, tanpui ngaite tanpui turin kawng hrang hrangah a inhmang fo a. 2011 European Golden Boot a dawn pawh kha a hralh a, a hralhna atanga a pawisa hmuh £1.2 million zet mai chu Gaza vela sikul eng emaw zat dinna atan a hlan vek a ni.

2015 kumah pawh khan Nepal rama lirnghing rapthlak tak mai tuartute tanpuina kawngah hma a la nasa hle a. Kha mi tumah khan Save the Children kal tlanga tanpui ngaite tanpuina turin Cristiano Ronaldo hian £5 million zet chu a lo pe bawk a ni.

Tanpui ngaite tanpui kawnga a inhmanna langsar deuh mai pakhat chu thisen pek lamah a ni a, Cristiano Ronaldo hian thisen pek hi a ngai pawimawh em em mai a, vawi eng emaw zat chu mamawhte hman atan a thisen hi a lo pe tawh thin a ni.

Thisen pek a ngaih pawimawh em avang hian Cristiano Ronaldo chu kawng hrang hrangah a fimkhur hle a, thisen inpek atanga natna inkai chhawn theih te a nih tel avangin amah pawh a invawng uluk hle a. Hetiang a nih avang hian a taksaah pawh tattoo chhuttir a duh loh phah a, tattoo a chhuttir chuan thisen a pek tam theih loh phah a hlauthawng a ni.

Inkaihhruaina dan an neihah an taksaa tattoo an chhuttir a nih chuan tattoo an chhuttir atanga thla 4 chhung chu thisen an pe thei dawn lo a, hei vang tak hian thla thum dana thisen pe thin Cristiano Ronaldo hian tattoo chhut chu a hnar phah ta a ni.

“Tu te pawhin thisen pek hi ngaih pawimawh a tha a, mi tana danglamna siam theihna kawng pawimawh tak a ni a. Vawi khat thisen kan pek hian damlo pathum tana thil tha ti kan ni thei a, hei vang tak hian kei pawhin thisen pek hi ka ngaih pawimawh phah lehzual a ni,” tiin Cristiano Ronaldo chuan a sawi.