Sunil Chhetri chuan India ram mipuite chu COVID-19 dona kawnga tangrual vek turin a sawm a, pawna chhuak lo turin a chah.

Thawhtanniah khan FIFA chuan COVID-19 darh mek dona kawnga hma la tur zingah India football captain Sunil Chhetri hi a thlang chhuak tel ve a. Khawvel hmun hrang hranga football la khel mek leh khel tawh lo mi 28 an thlang chhuak a, anni hian kawng hrang hrangin hma an la dawn a ni.

Chhetri chuan, “Coronavirus do hi thil awlsam tak a ni dawn hauh lo a, pawna kan chhuah loh a pawimawh ber dawn a. Mahni in chhungah tawm theuh ila, chhungkuain awm vek hlawm ila, him takin kan awm vek thei dawn a. He indonaah hian kan tanrual a pawimawh em em a ni,” a ti.

FIFA leh World Health Organization (WHO) te chuan footballer ho hi hma la turin an fawm khawm a, midang zirtirna kawngah te theihtawp chhuah turin a beisei hlawm a ni.

Mi 28 an thlan chhuahte hian video an siam ang a, tawng chi hrang hrang 13 a siam niin, heng video an siamte hi khawvel hmun hrang hranga awmte zirtirna leh fuihna a ni dawn a ni.

Hma la tura an thlan chhuah zingah hian Argentine superstar Lionel Messi te, World Cup winner Philip Lahm, Iker Casillas leh Carles Puyol te pawh an tel a. Gianluigi Buffon, Alisson Becker, Miroslav Klose, Michael Owen, Park Ji-sung te pawh an tel bawk a ni.

Mi 28 an thlan chhuahte:
Sami Al Jaber (KSA), Alisson Becker (BRA), Emre Belözoglu (TUR), Jared Borgetti (MEX), Gianluigi Buffon (ITA), Iker Casillas (ESP), Sunil Chhetri (IND), Youri Djorkaeff (FRA), Han Duan (CHN), Samuel Eto'o (CMR), Radamel Falcao (COL), Laura Georges (FRA), Valeri Karpin (RUS), Miroslav Klose (GER), Philipp Lahm (GER), Gary Lineker (ENG), Carli Lloyd (USA), Lionel Messi (ARG), Mido (EGY), Michael Owen (ENG), Park Ji-sung (KOR), Carles Puyol (ESP), Celia Sasic (GER), Asako Takakura (JPN), aya Touré (CIV), Juan Sebastián Verón (ARG), Sun Wen (CHN), Xavi Hernández (ESP)