​Taksa sawizawi kawngah Zoram țhlalai an harh thar

08th February 2017, 05:02AM

Hman deuh kha chuan Gym kal hi chu sek turin kan ngai nghal ringawt a, hmeichhe gym kalte pawh patil ang deuha ngaihna kan nei țhin a nih kha. Vawiinah chuan kan ngaihdante a danglam ve nasa ta hle a, Zoram țhalai gym leh kawng dunga exercise la an tam ta hle mai.

Kan khawsak a lo changkang chho ta zel a, lo neia eizawnna hna hrawmhraw tak chu khawpui mite chuan an kalsan tawh. Thlan tla lem lovin ei an zawng chho ta a, bike leh car te neiin veivahnan lirthei an hmang ta zel bawk a, mahse beisei loh lamah harsatna lian tak kan tawk ta tlat mai.

Drug hmanga inchui uar lai a liam tawh emaw tih laiin țhalai hrisel hmel pui puite chu an bai suih suih ta mai! Thenkhat an inentir a, damdawi man to deuh deuh an pawm haw țun țun bawk a. An hriatna tha zam a buai, an thahrui a na bawk, zun thlum, thisen sang, BP sang, etc an vei chho ta mawlh mawlh mai.

Gym : BHHO The Fitness Club

An ei a țha si, an taksa a fit bawk si lo, an thau a, computer khawihin nileng lengin hun an hmang, eitur țha nia an hriatte chu an tan thihna tur a ni chhunzawm ta zel si a! Exercise la țha si lova thil tui ber ber ei țun țun hi a hlauhawm zia Zoram țhalaite chuan an hrechhuak ta.

Zing ni chhuah hma atangin kawng dungah țhalaite an tlan suau suau a, zan lama chaw zawng chi tan erawh zing thawh hma a har, hun neih dan a inang si lova, chuvang chuan mi tam tak chuan Gym an bel bawk a. Aizawlah chauh pawh hian gym 10 chuang a awm, darkar tin hian an lun em em ringawt mai a ni.

A tui ber ber ei a, exercise lak țhat leh si loh hi ruihtheihthil tih ai pawhin a hlauhawm zawk ti hialin an lo sawi țhin. Kan tawng a, kan intawng harh a, tunah chuan kawng dik kan zawh chho ve ta mek zel a ni.

Hetia mahni hriselna ngaipawimawha theih tawp chhuah an awm laiin mi thenkhat erawh ram hlui zia; ngaihdan mak pui pui nei an la awm tlat mai. Kan nula țhenkhatte theih tawp chhuaha exercise an lak laiin; "Mawng tih len a tum, a dulkiar tih thep a tum mai mai alawm, mipa hip nan a ti mai mai a nih saw," ti te kan la awm a nih chu!

Hrisel lohna tak nei erawh an awm, mahse nulat tlangval laia dul tih kiar huat huat hi a mawi em ni? Kan taimak loh avanga kan dul a țhan tual tual laia, rim taka mahni taksa a nih dan tur anga a awm chhoh zel theih nana țan late kan han nuih ringawt hi chu a nuihzatthlak lehchhawng asin!

Gym : BHHO The Fitness Club

Nalh an duh avanga rim taka an thawh chuan an fitness pawh a țha dawn tihna a ni a, chu tluka hlu chu a awm thei dawn chuang em ni? Mizote hian Korean movie kan en nasa a, kan nulate'n kawppui atana an awh chu sa pan deuh, sam buk deuh hlek, smart taka inchei a ni tlangpui. Hei vang hian sek țeng țungte chu, "Ka ten," an ti mai zel. Mahse thil a danglam chho zel, tunah chuan taksa inphut nalh tawk tlangvalte chu kan nulate hian an ngaihmelh mek a nih hi.

Gym kal te hi sekna a ni ringawt lova, sekna lam khawih lova fitness lam chauh khawihte pawh an tam mai. Khawvel a changkang chho zel a, private firms an rawn lut chho zel bawk a. Chhun lama hnawthawk an awm laiin zan lama hnathawk țhin pawh an awm ta nawk mai. Tlan dawn chuan zingkar chu duhthusam ni mahse zingkar hun neih hman loh avangin mi tam tak chuan chhun emaw, zan emaw, tlaiah emawa exercise lak theihna gym an pan ta țhin a ni.

Mizo țhalaite hian eng eng emaw intihhmuh hi kan ching ve thova, han uar deuh hat kan nei țhin. Pool khelhte kha kan han uar a, a reh leh a, chutiang zelin. Thil reng reng hi chu a hunlai hi a awm ve zel a. Hetih lai hian taksa sawizawi kan uar chho hi chu kan uar tawh zawng zawng zingah chuan a la țha ber hial awm e!

Copyright © inkhel.com 2024. All rights reserved.