30 Nov 2018 04:39

inkhel

Taekwondo Team ten Silver 2 an la

November ni 27-29, 2018 chhung khan U-14 National School Games, Teakwondo vawi 64-na, Imphal, Manipur-ah neih a ni a, Mizoram team in Silver 2 an la.

Medal la tutte hi Lalhmudiki(kum 11) Lunglei Electric Veng P/S naupang leh Jonathan F.Lalhmingmawia, Ramthar Veng, St.Lawrence School nuapang te an ni.

Lahmudiki hian under 24 kg huangah khelin match hmasa berah Chandigarh naupang Knock out in a hneh nghal a. match hnihnaah 38-6 in Goa a hneh leh a. Quarter final-ah 32-24 in thenawm ram Assam chu a hneh leh bawk. Semi finalah J& K naupang nen intum in 26-21 –a hnehin Final a lut ta a. Finalah hian Tamil Nadu naupang amah aia sang zawk nen in tumin round 3 an khelh zawng zawngah Diki hian 11-9, 9-9, 7-5 in a thunun vek a mahse penalty(hremna) 7-4 in Tamil naupang aiin dawn tam zawk vangin 31-30 in a chak loh phah ta thung a. Uihawm takin Leitlangpui naupang hian Silver a la ta a ni.

Aizawl Taekwondo Academy, Electric Veng a zirlai Jonathan-a hian Under 41kg huanga Silver a lakna kawngah Bihar chu 13-8 in a sawp phawt a. A match hnihnaah U.P. 20-14 in a hneh leh a. Quarter Final-ah 13-10 in a mah aia sang zawk Punjab naupang a hneh leh bawk. Semi final-ah hian Jharkhan naupang nen an in nuai tawk hle a. Hun pangaiah 11-11 a in draw in tie break khelh hial a ngai a. Jonathana hian a chung nun zawkna tilangin 5-3 a hneh a, final a lut ta a ni. Ramthar veng naupang hian Finalah a thlengtu Khaidem Robert of Manipur nen an in tum a. Thiamna lam intluk hle a, mahse Tharum lamah Jonathanan a hneh lo deuhna a lang a, round 3 khelhah Manipuri hian round 2 lain Jonathanan round 1 chauh a la thei a. 4-5,3-2,6-4 = 14-12 in a chak zo ta lova, Silver a la ta a ni.

Manager David-a hian Mizoram team te khelh danah a lungawi thu sawiin pumrua lamah an te zawk zel a, tharum kan nei thung a ti a. U-14 National ah kan vawi 1 telna a ni a, medal 2 bakah quarter final kan thleng nual a, kum thar lamah chuan hei aia chet that ngei a inrin thu sawiin sum leh tha tumtute School Education deptt leh MATA chungah lawmthu a sawi a, nu leh pate support-na tha tak leh tawngtaipuinaah lawmthu a sawi bawk.

National School Games-ah hian State leh UT zawng zawng atangin team 32, player 520 an tel a. A pumpuiah a thlengtu Manipur an champion a ni.

Mizoram Team hi Manager David Lalthanngura Sailo (School Edu.deptt), Durjeet Singh(SAI) leh Lalinpuia(Armed Veng South) ten an hruai.