June ni 5-7, 2019 chhunga zawh tak 3rd Kukkiwon Cup Taekwondo Championship, New Delhi-a zawh taka pahnihna Mizoram Taekwondo team lawmpuina hun June ni 13, Ningani chawhma dar 11:00 khan infiammite inpui, MSSC Office, Upper Khatlaah buatsaih a ni.
He huna khual lian Pu C.Lalrinzuala chuan " Taekwondo Association hian fak an phu em em a, an hming kan hriat rual hian an discipline that zia hi rilruah a lo lang nghal thin. Hruaitu an nei tha a, result tha tak tak an nei thei reng a, Kukiwon Cup a team runner up an ni thei pawh hi an phu hle a ni. Hei hi inelna sang zawk, Asian Games leh Olympic medal lak theina tura kailawn, bul tanna a ni" tiin zirna thlahthlam lo tur leh lehkhathiam bawk, taekwondo thiam bawk ni turin player te a fuih.
Kukkiwon cup ah hian a pumpuiah Mizoram chuan point 114 hmuin 2-na an ni a. Point 123 hmutu a thlengtu Delhi chu pakhatna an ni a.
Mizoram Team hian Poomsae(form) inelna bikah Gold 18, Silver 3, Bronze 1 lain Kyorugi(fight) inelnaah Gold 5, silver 4 leh Bronze 2 an la bawk a, Gyokpa(Breaking) inelnaah Silver 2 an la bawk.
Mizoram hi nikum 2018 ah khan team champion an ni tawh a, kumina champion a thlengtu Delhi chuan Trophy bakak Hyundai Car i10 an dawn thu team manager R.Lalrinmawia chuan a sawi.
He championship endik tur hian World Taekwondo Headquarters chuan Asian Taekwondo Union(ATU) Referee Vice Chairman Tae Bong Lee a rawn tir a, South Korea Ambassador Shin Bong Kil chuan hmanpuiin, Hyundai Execute Director Un Yong Yo te, Grand Master Jeong Hee Lee 7th Dan leh Grand Master Jay Ku Lee 7th Dan ten an vil bawk. Tin, Master Joseph Thansanga chu he championship Arbitration Board Chairman atana ruat a ni bawk.
Team 139 telna Kukkiwon cup-ah hian India bakah ram pawn atangin Afghanistan, Kuwait, Korea, Nepal te an tel a ni.
Pu VL Sawma, Sr.Vice President, MATA pawhin thu sawiin, khawvel ram dang - USA, South Korea leh Europe a Kukiwon Cup leh New Delhi a Kan khelh zawh tak te hi a hlut dan a in ang tlamg vek a ni tiin kum 2028 Summer Olympic awm turah India team aiawha tel ngei kan tum a, ruahmanna kan siam mek a ni a ti ve bawk.
Taekwondo medal lawmna hun hi Pi Lalmawipuii, Accounts Officer chuan a kaihruai a, a tih thin danin medal latu leh official te hnenah lawmpuina thilpek a hlan leh theuh a ni.