07 Jul 2019 08:53

inkhel

Taekwondo Fight League (TFL) a hun a thleng dawn

July ni 9, Thawhlehni zan dar 8:00-ah Taekwondo Fight League chu Electric Veng YMA Hall-ah khelh tan a ni dawn a, fight league khel turte TFL Team leh Cadet Team te chu July ni 6, Inrinni khan MATA Hall Republic Vengthlangah TFL kalphung inzirtirna leh Inbukna neih a ni a, fight league khel turte inziah felna hun neih anih bakah TFL hmeichhe team pahnih te President team leh Vice President team tur te ruat fel a ni nghal bawk.

TFL khel tur Briefing naah hian TFL player leh Cadet plyer te bakah Club hruaitute pawh an kalkim tha hle a ni.

Technical Official tur te pawhin World Taekwondo Competition Rules thar ber zirhona neiin International Referee Master Joseph Thansangan zirtirna a pe a, Dan thar ber hman a ni dawn a ni.

Taekwondo Fight League-a World Taekwondo Dan thar an hman tur hi Point 1,2,3,4,5 hmuh theihna tur a awm dawn a. Penalty leh Awma hnekin point 1, Awm (chest) a pet fuhin point 2, Lu a pet fuhin point 3, Vir chunga Awm leh Lu a pet fuhin point 4 leh 5 a hmuh theih dawn a ni.

Kum danga awm lo Yellow Card hremna a awm thar bawk ang. Yellow Card hi match khelh laia mawi lo uchuak tak leh hun tih khawtlai luih tum te hrem nan hman a ni ang a, Penalty Rs 300/- zel an chawi tel bawk ang.

Inman beh, tlanchhiat, tluk luih, hmaia hnek, Arena pawna chhuah te chu Gam-jum hmanga hrem a ni thung ang. TFL match khat hi Round 5 niin round khatah mi 5 zel an in tum chhawk ang a, zan tin Cadet team nen match hnih bakah TFL Dance Battle hmuhnawm tak en tur a awm bawk dawn a ni.

TFL Dan in zirtirna hi Organising Secretary Pu Joseph Thansangan a kaihruai a, Competition Rule zirtirna a pe nghal a bawk. He hun hmanpuitu MATA President Dr.Rualkhuma Colney chuan thu sawiin Taekwondo Pawl a ngainatna chhan chu Ruihhlo an dova, zuk leh hmuamah an fihlimin, ti lo tura an hmalakna te leh nungchang mawi tak, Martial Arts-in a ken tel tlat senior te zahna an nunpui dan te hian a rilru a hneh thu a sawi.

TFL buatsaih chhan ber, veng mite nena thawhhona tha te, club leh player hmasawnna a hrinchhuah ngei a beisei thu a sawi a, player zawng zawng te duhsakna a hlan bawk.

Tin, Organising Chairman Pu VL Sawma chuan MATA hian a tum ber chu Olympic 2028 a mizo tel a ni a, TFL hi rahbi hmasa ber a niin, hetatang hian player tha, chher tur an hmuh ngei an beisei thu a sawi bawk.

*TFL khel tur team te*:

1.Armed Veng Warriors,

2.Armed Veng South Pasaltha,

3.St.Joseph HSS RSC Fighters,

4.RepublicVengthlang Fighters,

5.Zopa Goldsmith Chawnpui

Cadet team khel turte

1.ATA Electric Veng Fighters

2.Luangmual Taekwondo Club

3.Exodus English School

4.St.Joseph HSS RSC Fighters

5.Zopa Goldsmith Chawnpui te an ni

(adsbygoogle = window.adsbygoogle || []).push({});