10 Jun 2019 12:28

inkhel

Taekwondo Championship-ah Mizoram team an champion.

June nj 1-3, 2019 chhung khan Bhutan khawpui Thimphu-ah 5th International Kyorugi (Fight) & 4th International Poomsae Taekwondo Championship neih a ni a, Kyorugi-ah Mizoram chu team an champion.

Poomsae-ah pahnihna an ni bawk a, an pual hian Mizoram State Sports Council chuan June ni 10, Thawhtanni chawhma dar 11:00 khan lawmpuina hun a buatsaih.

Bhutan-ah hian Mizoram team chuan Gold 4, Silver 3, Bronze 7 laiin Poomsae Inelna bikah Team Champion an ni a, Malaysia pahnihna an ni. Kyorugi inelnaah Gold 8, Silver 4, Bronze 3 lain Runners Up Trophy an dawng a, a thlengtu Bhutan chu team Champion an ni ve thung.

Mizoram hi he championship buatsaiha Poomsae inelna bikah Team champion a zawna vawi 3 ni thei awm chhun niin kum 2017, 2018 leh 2019 ah te an champion a.

He intihsiaknaah hian India in team riat an thawh a, a thlengtu Bhutan in team hnih thawhin Malaysia leh Nepal ten team khat ve ve an thawh bawk.

Mizoram aiawh hian player 26 kalin Coach Zohmingthanga, Bilkhawthlir leh Manager H.Lalthazova, Chaltlang ten an hruai a ni.

He huna khual lian L.Thangmawia, MLA chuan international event hi a boruak a dang a, rilru leh taksa, sum leh pai thlengin a hautak bik a, chuti chunga hetiang zat medal in rawn hawn thei hi a ropui taket a ni a ti.

Sports leh zirna hi a kalkawp a, routine fel tak neiin theihtawpin kan luhchilh tur a ni a, hlawhtlinna a awm tih a chiang em em tawh a. Sports hi hlimhlawp leh kahpah ringawta kalpui chi a ni lova, mi hlawhtlingte sulhnu han thlir hian an hlawhtlinna lai chauh hmuh a awl a, hlawhtling tura harsatna leh theihtawp an chhuahna lai kan hmuhpui a ngai tiin taekwondo medalist te, hlawhtlinna sang zawk chang zel turin duhsakna a hlan.

VL Sawma, MATA Sr.Vice president pawhin thu sawiin pawl budget pawnlam, mahni sum sengin tun tumah hian kan naute an zin a, players nu leh pa leh kan hlawhtlinna tha taka min lawmpuia min lo thlengtu MSSC chungah lawmthu kan sawi. Bhutan bakah hian Kukiwon Cup, New Delhi ah hlawhtlinna chang zuiin team runner up kan ni a, tunah hian Hyderabad ah Indian Open a tel turin kan naute an thang mek bawk a ni a ti.

Mizoram Taekwondo team lawmpuina hun hi C.Laltlanthanga, Secretary, MSSC in a kaihruai a, medal latu zawng zawng leh team official te hnenah MSSC chuan lawmpuina thilpek a hlan leh theuh a ni.

(adsbygoogle = window.adsbygoogle || []).push({});