February ni 18, Thawhtanni chawhma dar 11:00 khan infiammite inpui MSSC Office-ah a tum khat nan infiamna chi thum - Hockey, Wushu leh Taekwondo-a Mizoram tana medal latute lawmpuina hun hman a ni.
9th Hockey India Junior Women National Championship (A-Division) chu Kerala-ah January ni 31 atanga February ni 10, 2019 khan neih a ni a, Mizoram hmeichhe team chu pathumna niin bronze medal an dawng a.
18th Sub-Junior National Wushu Championship 2019 chu Jalandhar, Punjab-ah January ni 22 -27, 2019 chhung khan neih a ni bawk a, Mizoram team chuan Silver medal an dawng bawk. Tin, tun hnaia ram pum huap Taekwondo inelna tum thum - 64th National School Games - Under-14 (Taekwondo), Imphal, 38th National Junior Taekwondo Championship, Shimoga, Karnataka leh 35th National Sub-Junior Taekwondo Championship & 9th National Sub-Junior Poomsae Championship, Hyderabad, Telangana-a neihahte Mizoram chuan silver medal 3 leh bronze medal 3 an dawng bawk.
Mizoram team official-ten report an pek danin match official ten thutlukna dik lo tak an siam fo avangin an beisei ang Mizoramin medal an la thei lo niin an sawi vek a.
Mizoram team hockey coach Lalrothuami (Bi-tei) chuan, " Ni 11 chhunga khelh Division A championship-ah hian team 20 kan tel a, Mizoram chu Pool C-ah Odhisa, Himachal, Maharashtra leh Andra Pradesh te nen kan awm a. Maharastra kan hnehtawk tihah chuan kan chak vek a ni. Quarterfinal-ah Odisha 3-0 a hnehin semifinal kan lut a, Haryana nen final luh kan inchuh tum hian goal kan vawlut hmasa a, an sut hnuah hma hruaiin tum hnih an vawlut leh a, 3rd quarter-ah tum thum kan vawlut ve leh a, mahse tum 1 chiah min pawmsak avangin 4-1 a chak tura kan inngaih laiin 2-3 in kan chak ta lo a ni. UP nen pathumna kan inchuh a, phu taka hnehna changin a tum khat national-ah Mizoten medal kan la ve ta a ni" a ti.
Wushu-a Mizoram team coach Dailova chuan match official ten Mizote min tan loh em avangin medal kan beisei ang kan la thei lova, silver latu awmchhun kan neih hian a khingpuite a knockout fai deuh vek a, final-ah a vanduai ta a ni a ti ve bawk.
He huna khual lian Pu John Tanpuia, Joint Director, SYS chuan, "Mizoram team pathumte hlawhtlinna hian sports tuipuitu leh luhchilh mek tam tak a tiphurin chona a pek ngei ka ring a ni" a ti a. " In lakah sang zawk thleng tura beiseina kan nei a, Mizoram tihmingthatu mai ni lo, India aiawha Olympic thlenga medal ropui tak latu ni thei turin kan duhsak em em che u a ni" a ti bawk.
Game discipline pathum - Taekwondo, Wushu leh Hockey te medal lak lawmpuina hun hi H.Thangchungnunga, SPO chuan a kaihruai a, lawmpuina thilpek MSSC chuan hlanin thingpui a inpui bawk a ni.