Twenty20 World Cup khelh mekah nizan khan India leh New Zealand te an inhmachhawn a, India hi wicket 8 laiin an tlawm.

Toss-ah New Zealand an chak a, bowl hmasak an thlang a, India hian over 20 chhungin run 110 bak an siam lova, wicket pasarih an chan a, four pariat leh six pahnih bak India hian an vaw thei lo.

New Zealand hian an target hi over 14.3 chhung lekin an um thleng a, bowl 33 la nei chungin India lakah awlsam takin hnehna an chang a, wicket pahnih bak an hloh lo.

India hian New Zealand an tum hma chiah hian an hmelma Pakistan an hmachhawn a, hetah pawh hian India mualpho hle in wicket 10 laiin tlawm zawkah an tang.

Group 2-ah hian Pakistan chu hmahruaitu an ni a, anni hi khelh thumah la chak vekin, an hnuaiah point li nei Afghanistan an awm a, New Zealand leh Namibia te chuan point hnih ve ve neiin, India leh Scotland te’n point an la hlawhchhuak lo.

India hian group stage hi an paltlang duh a nih chuan tunkar hian Afghanistan lakah hnehna an chan ngei ngei a ngai a, Afghanistan hi an hneh a nih pawhin Afghanistan hian New Zealand an hneh ve leh loh chuan India tan chance awm lo tluk a ni dawn.

India hian Afghanistan an hneh a, Afghanistan-in New Zealand an hneh bakah hian India hian Scotland leh Namibia te an hneh leh ngei ngei a ngai dawn bawk a, heng zawng zawng bakah hian India hian Afghanistan leh New Zealand-te hi net run-rate ah an khum ve ve an ngai bawk a ni.

India captain Virat Kohli chuan, “Kan bat leh kan bowl khan kan huaisen tawk lo ve ve in ka hria a, New Zealand an khel tha zawk a, first ball atang khan pressure min pe nghal. T20-ah chuan heti ang hi a thleng thin reng a, bat a harsat phah hle thin.

“T20 cricket khelh dan hi chi khat chiah a awm a, phur taka khelh a risk lak ngam a ngai. Indian cricket team kan nih avang ringawt hian kan khelh dan a danglam thei lo a ni,” tiin New Zealand laka an tlawm hnuah a sawi.