31 Aug 2018 12:42

inkhel

Swapna Barman hnenah Rs. 10 lakh leh sorkar hna

Asian Games neih mekah India tan a vawi khatna atan Swapna Barman chuan heptathlon ah gold medal a la a, hei vang hian West Bengal Chief Minister Mamata Banerjee chuan Swapna Barman hi Rs. 10 lakh pek a tiam.

Jakarta khawpuiah kum 21-a upa Jalpaiguri nula chuan India tan chanchin duhawm tak a ziak thar a, event chi sarih ngawt mai hmanga intihsiakah Swapna hian point 6026 a hmu a, a aia point hmu sang an awm lo a, India chu bung thar kaipuiin gold medal hi a la a ni.

Bengal tourism minister Gautam Deb chuan Swapna chhungte chu tlawh chhuakin, phone hmangin Swapna nu chu Chief Minister nen a inbiaktir zui niin West Bengal Athletic Association secretary Kamal Maitra chuan a sawi.

Kamal Maitra chuan, “CM chuan Swapna Barman hi Rs. 10 lakh pek a tiam mai bakah sorkar hna pawh pek a tiam tel bawk a. Tourism minister Gautam Deb chu Swapna te inah hian darkar chanve vel zet a awm a ni,” a ti.

Swapna hi September 3-4 hian India ramah a rawn kir leh beisei a ni a, WBAA te pawhin lawmpuina leh chawimawina hun hman an tum niin Maitra hian a sawi bawk.

India tana gold medal a lak hnu hian Swapna hian lawmpuina a dawng nghal mawlh mawlh a, hetianga lawmpuina thu thawntu zingah hian Bengal icon Sourav Ganguly pawh a tel a. Ganguly hian a Twitter account lamah Swapna a lawmpui thu hi a tarlang a ni.

West Bengal nula Swapna hi retheihna hneha dinhmun sang taka ding thei zinga mi a ni mek a. Unau pali zinga pakhat, khawsak harsa em em mai, harsatna chi hrang hrang paltlang chho a, hlawhtlinna hmel hmu thei a ni.

A pa hi Panchanan Barman a ni a, rickshaw hnuktu a ni thin a, mahse stroke avangin a hna pawh a thawk thei ta lo a, inah a awm deuh chawt tawh a. A nu Basana Devi chu mi hnenah a inhlawh thin a, thingpui huanah te pawh a thawk tel bawk thin a ni.

An fa naupang ber Swapna chu infiamna lamah a tui hle tih an hriatin Pachanan Barman chuan mau a phel a, chumi hmang chuan Swapna hian an in piaha mual zawlah chuan high jump a zir thin.

Sikul banah Swapna chu a inzir thin a, a pheikhawk tawt tawh tak mai chu hrehawm ti deuh chungin a bun a, duh thlan tur dang a neih loh avangin ke na chung chungin a bun mai thin a, chuti chung chuan amahin training chu a nei zel mai a ni.

An sikulah high jump inelna an neih tumin Swapna hi a tel a, pakhatna a nih atangin a nu Basana Devi pawh chuan a phurpui lehzual a. A training hi a chhunzawm zel theih nan a nu chuan Jalpaiguri Sports Complex-ah a thlah thin a. Athletics ber kher chu infiamnaah pawh hmathlir awm tha lo pawl a nih bakah an chhungkaw sum lakluh a beitham bawk a, heti chung hian Swapna chuan theihtawp a chhuah zel a, Jalpaiguri atangin Jakarta a thlen theih phah ta a ni.