​Suzuka-ah Nico pakhatna

09th October 2016, 08:10PM

Kumin F1 season khar a ni tep tawh, Japanese GP tlan zawh a ni a, intlansiak vawi 4 chiah a awm tawh. Japanese GP-ah hian German driver Nico Rosberg chu pakhatna a ni a, championship-ah Nico hian hma a hruai chhunzawm ta zel a ni.

Red Bull driver naupang Max Verstappen chu pahnihna niin champion lai Lewis Hamilton chu pathumna a ni a. Hamilton a che chhe chho ta mek zel a, point 33 laiin Nico hi championship-ah a thlau ta.

Intlansiak vawi 4 chiah a awm tawh, Hamilton hi pakhatna ni vek mahse Nico hi pahnihna a nih vek pawhin Hamilton hian Nico hi a um phak tawh dawn lo a ni.

Suzuka-ah hian Mercedes driver pahnihte'n podium an chan leh avangin Constructor's championship-ah Mercedes chu umphak theih an ni ta lo a ni. Intlansiak vawi 4 atang hian point 100 hlawhchhuah theih a la ni a, Hamilton tan hian Nico umphak chu hna hautak tak a ni tawh ngei dawn a ni.

Nico hian 2014 leh 2015 khan Japanese GP-ah Pole atangin bul tan mahse Hamilton chu pakhatna a ni ve ve a, kuminah erawh pole atangin bul a tan leh a, pakhatna a ni ta a ni.

Pole atanga bul tan Rosberg chu a tir atanga a tawp thlengin a chungnung a. Hetih lai hian Hamilton erawh intlansiak tir lamah harsatna a tawk leh a, hei vang hian ngai a awh leh thei ta lo a ni.

Tun season-ah Mercedes driver pahnihte hi champion tura inel ber an ni chho leh a. Singapore GP thleng khan engine failure hi vawi khat ve ve an nei a. Bul tan that loh erawh Hamilton-a'n a nei ngah zawk a. Vawi 2 Hamilton a chetsual tawh laiin Nico erawh vawi khat chiah a la chesual a ni.

Ferrari driver Sebastian Vettel chuan Hamilton chu lap tawp lamah na takin um mahse Hamilton chuan podium a chang ta thova, Vettel chu palina niin, a team-mate Raikkonen chu pangana a ni a. Intlansiak hnuhnung bera che ropui tak Daniel Ricciardo chu 6-na niin Force India driver pahnih ten an dawt bawk a ni.

Japanese GP result

1. Nico Rosberg, Mercedes, 1:26:43.333

2. Max Verstappen, Red Bull, + 4.978

3. Lewis Hamilton, Mercedes, + 5.776

4. Sebastian Vettel, Ferrari, + 20.269

5. Kimi Raikkonen, Ferrari, + 28.370

6. Daniel Ricciardo, Red Bull, + 33.941

7. Sergio Perez, Force India, + 57.495

8. Nico Hulkenberg, Force India, + 59.177

9. Felipe Massa, Williams, 97.763

10. Valtteri Bottas, Williams, + 98.323

11. Romain Grosjean, Haas, + 99.254

12. Jolyon Palmer, Renault, + 1 lap

13. Daniil Kvyat, Toro Rosso, + 1 lap

14. Kevin Magnussen, Renault, + 1 lap

15. Marcus Ericsson, Sauber, + 1 lap

16. Fernando Alonso, McLaren, + 1 lap

17. Carlos Sainz, Toro Rosso, + 1 lap

18. Jenson Button, McLaren, + 1 lap

19. Felipe Nasr, Sauber, + 1 lap

20. Esteban Gutierrez, Haas, + 1 lap

21. Esteban Ocon, Manor, + 1 lap

22. Pascal Wehrlein, Manor, + 1 lap

Copyright © inkhel.com 2024. All rights reserved.