Roger Federer chuan a vanglaiin title 100 a la tling thei ta a, mahse hemi vanga mi tam takin ‘Superman’ tia an sawi chu phu lo a intih thu a sawi.
Indian Wells Masters atana inpuahchah mek Roger Federer chuan, “Buaithlak deuh chu mi hian infiammi tha deuha an hriat hi Superman nihna an pe mai thin a, hetiang ni tak tak ang maia sawi zui te pawh a awm thin,” a ti.
“An sawi ang em em hi ni theiin ka inhre lo a, chutiang hmuh chuan ka inhmu thei lo hrim hrim bawk a. Mihring duhthusam hi an awm thei lo hrim hrim a, mi zawng zawngin fel lohna an nei vek a, kei pawhin ka nei chiang a ni,” a ti bawk.
Federer hian Grand Slam title 20 ngawt mai a kawl tawh a, tun hnaia Dubai Championship final-ah Greece star Stefanos Tsitsipas chu 6-4, 6-4 in a hneh a, title 100 a la tling thei chiah a ni.
Swiss star Roger Federer hi Indian Wells Masters atan fourth seed a ni a, California Desert-ah hian second round ah Peter Gojowczyk emaw, Andreas Seppi emaw a hmachhawn ang a. Swiss player tho, Grand Slam title pathum kawltu Stan Wawrinka chu third round-ah a hmachhawn thei dawn a, Japanese sixth seed Kei Nishikori pawh a kalkawngah a awm thei bawk a ni.
Kum 37-a upa Federer chuan title 100 lak tlin theih a inrin ngai loh thu sawiin, hetiang zat title la thei pahnihna a ni a. Jimmy Connors chu title 100 la tling thei hmasa ber niin, a title lak zawng zawng chu 109 a ni.
“Ka thil tihpuitlin theih tura ka ngaih miah loh, eng tikah mah ka tih theih ka rin loh chu ka ti ve ta reng mai a. Thla kua atanga kum khat kalta vel bawr atang khan hetiang lampang hi ka rilruah a awm ve tan chiah a. Title 100 lak tlin tih vel hi title 96 emaw, 97 emaw ka lak khan ka rilruah a lang ve tan chauh a ni,” tiin Federer chuan a sawi.
Nikum October thla khan Basel khawpuiah Federer hi a champion a, kha kha title 99 a lakna chiah a ni a. Hemi hnu hian Paris Masters-ah a tel leh a, mahse a champion thei ta lo a. London khawpuia ATP Finals-ah pawh telin a champion thei leh ta lo bawk a, Melbourne khawpuiah a hlawhchham zui leh a, title 100-na chu a la thei ta mai lo a. A hnuah Dubai lamah chuan chelh din theih a ni ta lo a ni.