Arsenal director of football Raul Sanllehi chuan tun hnaia sawi hlawh tak European Super League khelh chungchang chu an sawi ve ngei thu a sawi chhuak.

Tun thla tirah khan Football Leaks chuan Europe khawmualpuia club lian 11 te chuan a hranpaa league thar neih tumin ruahmanna an siam niin an tarlang a. Heng club 11 te hian club dang 1 an sawm belh ang a, 2021 atangin European Super League neih tan tum angin an tarlang a ni.

UEFA chuan he thuthang chungchangah hian thu leh hla an nei tawh a, Super League neih tumna chu an dodal tlat dawn niin an sawi a. He league thar ruahmantu zingah hian Arsenal pawh sawi tel an ni a, hei vang hian Arsenal chu an tawng chhuak zui nghal a ni.

Gunners hi Premier League-ah pangana an ni mek a, season hnih chhung chu UEFA Champions League an khel pha tawh lo bawk a. Europe khawmualpuia club inelna sang bera tel leh hi an duh hle a, hetih lai hian hmun danga tel erawh an tum kher lo niin Raul Sanllehi hian a sawi.

“Arsenal chu hun lo kal zel turah dinhmun tha thei ang bera ding zel thei turin kan duh a, tunah hi chuan engmah thil thar kan bawh dawn lo a. UEFA nen inremna kan la nei a, kan la thawkho mek bawk a. Mahse, nakin zela thil thleng tur chu engmah sawi lawk theih a ni lo a, hun bawkin a la hril zel dawn a ni,” tiin a sawi.

“Super League neih tur chungchang kha kan sawi ve ngei a, nakin zelah kan tana tha zawk tur a nih leh nih loh te kan thlir ve kha a ngai a. Kawng dik zawh thei ngei tura inbuatsaih lawk hi a pawimawh a ni,” a ti bawk.

A sawi zelnaah, “Football Leaks khan a ruka thil ti ni awm takin min chhuah lek lek maiin a hriat a, mahse engmah thuruk a awm reng reng lo a. An thu chhuahah khan Arsenal hming chu a lang chiang mai a, Barcelona hming pawh a lang bawk a. Mahse, hming ziah hnan engmah a awm lo tih ka sawi duh a, thutlukna engmah siam a awm lo a, ruahmanna chauh a ni,” tiin a sawi.